click

PLAY 

10 alumno a sigui e klas pa muchanan hopi inteligente ku éksito

Djaweps último tabata e último dia di e klas pa muchanan hopi inteligente (hoogbegaafd) pa e aña eskolar aki. E alumnonan a sera e programa ku un presentashon di nan proyekto riba e último dia di skol. A partí alumnonan, di 9 pa 11 aña, den dos grupo i nan a traha proposishonnan pa kombatí plèstik riba e isla.

Nan mayornan orguyoso tabata e publiko durante e presentashon. Despues di e presentashon tabatin un klousura festivo riba playa na Donkey Beach.

A kuminsá ku e proyekto piloto pa muchanan hopi inteligente na yanuari pa duna alumnonan di grupo 6, 7 i 8 di enseñansa básiko e oportunidat pa sigui desaroyá nan talento. Un dia pa siman e muchanan a risibí un otro forma di lès for di skol regular. Nan a traha riba proyektonan pa stimulá nan talentonan. A pone hopi énfasis tambe riba siña traha huntu, nan mes tuma inisiativa i responsabilidat, i nan mes hasi investigashon.

Dies alumno di e diferente skolnan básiko a partisipá na e proyekto piloto. Durante evaluashon a sali na kla ku e formanan di lès alternativo aki, banda di skol regular, tabata bon pa hopi di e muchanan ku tabata den e grupo piloto. Mayornan i muchanan tabata hopi entusiasmá pa e lesnan i ta konvensí ku esaki tin un balor agregá pa e alumnonan. Skolnan tambe ta satisfecho ku e enseñansa adishonal aki. Un bon palabrashon ku e dosente na skol i koperashon ku guianan interno ta importante den esaki.

Expertisecentrum Onderwijs en Zorg (EOZ) ku e direktivanan di skol i fundashon Hobennan i Futuro ta den konsulta tokante kontinuashon di e proyekto aki otro aña eskolar.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com