click

PLAY 

Boneiru ta saliendo for di e periodo di krísis

Boneiru ta saliendo for di e periodo di krísis, bayendo den un direkshon di rehabilitashon mas i mas di nos ekonomia i nos manera di funshoná riba nos isla. Esaki gezaghebber Edison Rijna a trese dilanti durante konferensha di prensa ku tabatin djabièrnè atardi.


“Loke nos ta bai hasi ta duna mas espasio na nos komunidat pa biaha i tambe duna oportunidat pa turistanan por bolbe bishitá Boneiru manera tabata e kaso, te na sierto nivel, manera antes”, segun gezaghebber Rijna. Pa splika e pasonan pa habri nos frontera a traha un asina yamá Roadmap, Rijna a sigui bisa. A traha e Roadmap aki den koperashon ku diferente stakeholder den nos komunidat. 


Saliendo for di e situashon di krísis ta nifika tambe ku a de-eskalá e aktividat di EBT. E nivel di urgensia ta keda si manera e ta, pero ta bai den un modus di ‘dormant’. Esei kiermen ku ta keda alerta i si mester aktivá, lo aktivá mes ora. Rijna a trese dilanti ku ta pasa responsabilidat pa e team di rekonstrukshon i rehabilidatashon di nos ekonomia, ku Kolegio Ehekutivo ta atendé kune. Di otro banda ta keda si ku un team chikitu di krísis ku ta keda vigilá kualke situashon ku presentá.


Gezaghebber Rijna a bisa aserka ku na Boneiru nos ta sigui mantené e reglanan ku a menshoná for di inisio di e krísis, manera distansha sosial, tosa den elleboog, laba man frekuente ku habon i evitá di ta den gruponan grandi den espasio no ventilá. “Naturalmente ku habrimentu di nos fronteranan sèmper ta keda e posibilidat ku hende por bira malu. Na e momentunan aki nos tin sufisiente kapasidat pa tèst personanan na Boneiru (pa corona virus), i tambe e nivel di kuido ta sufisiente pa atendé e personanan ku nos ta laga yega akinan”, gezaghebber a sigui bisa. Naturalmente lo pone hopi atenshona na protehá e personanan mas vulnerabel den nos komunidat.


Otro punto ku Rijna a mustra riba dje ta ku gobiernu di Boneiru, i su persona, tin hopi apresio pa e manera kon komunidat a koperá te ku aworaki den e periodo di krísis, kumpliendo ku reglanan, loke a pone ku no tabatin masha kaso di covid-19 na Boneiru. Gezaghebber ta bisa di ta sigui konta ku koperashon di un i tur den e tempu benidero tambe pa mantene disiplina i sigui kumpli ku reglanan di higiena ku tin.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com