click

PLAY 

Boneiru ta selebrá su di tres aniversario komo e prome isla ‘Blue’ na mundu

8 di yüni ta eksaktamente tres aña ku a nombra Boneiru komo e promé isla “Blue” na mundu. For di e fecha aki diferente inisiativa i proyekto a tuma lugá rònt di e programa di Blue Destination. Ku hopi satisfakshon por reflehá bek riba tur e logronan positivo durante e aña tras di lomba.


E vishon di Bonaire Blue Destination ta pa kréa oportunidat nobo pa un progreso i bienestar balansá pa nos komunidat i futuro generashon.  Pa medio di sinergia entre nos kultura, naturalesa i ekonomia nos ta mantené Boneiru su identidat úniko i representá esaki ku orguyo. Un di e logronan ku nos por para ketu na dje awe ta e formalisashon di grupo di guia pa Blue Destination. E grupo aki ta konsistí di TCB, OLB, STINAPA, SKAL, BONHATA, KVK, BIA, TELBO, WEB i SELIBON. TCB ta fungi komo e presidente di e grupo aki i tambe huntu ku un lider di proyekto ta dirigí, manehá i kordiná e aktividatnan rònt di Blue Destination. Kada un partner den e grupo aki ta responsabel pa duna forma na e metanan di Blue Destination i krea un identidat ku por sinti, enkurashá i propagandá pa e isla kompletu. E grupo di Blue Destination tambe kier “lead by example” esaki ta nifika ku e grupo kier ta un pionero i un estímulo pa inisiativanan sostenibel na nos isla.


Otro logro mas ku nos por para ketu na dje awe den kuadro pa transformá Boneiru den un Blue Destination ta e akuerdo di entendimentu ku a keda firmá entre OLB i fundashon Green Destinations aña pasá na novèmber 2019. E akuerdo di entendimentu tabata enserá un programa di sertifikashon pa asina por determiná kon leu Boneiru ta kumpli ku e kondishonnan pa por yama su mes Blue Destination. A apunta e ouditoria di e programa di sertifikashon aki na fundashon Green Destinations pa asina hasi un “pilot” ku kompanianan lokal. E sertifikashon ta fungi komo un liña pa por tuma medida dirigí pa logra metanan di sostenibilidat. Den e programa di sertifikashon a definí normanan ku ta apliká mundialmente i a tradusí esakinan den normanan pa e situashon lokal i ambishon di Boneiru. Den futuro pa por konsiderá un organisashon òf negoshi un kompania “Blue” na Boneiru, e mester pasa den e proseso di sertifikashon aki.


Banda di esaki Blue Destination a pone mas atenshon na nos kultura durante e aña tras di lomba. Esaki a wòrdu hasí pa medio di e dos kampañanan “Show Me Your Blue” durante karnaval i “Wapa Challenge” riba Dia di Rincon. E meta di e kampaña durante karnaval “Show Me Your Blue” tabata pa konsientisá karnavalistanan ku tepnan balioso pa tene nos isla limpi i alabes kon pa minimalisá uso di plèstik i e impakto di sushi durante nos karnaval. E aseptashon pa e kampaña aki tabata grandi i por a mira diferente karnavalistanan ku nan beker re-usabel i otro práktikanan sostenibel durante e marchanan. Lamentablemente pa motibu di e pandemia di COVID-19 Boneiru no a selebrá Dia di Rincon manera a kustumbrá. Pero pa tòg trese e selebrashon serka di nos hendenan, grupo di guia Blue Destination a krea un kampaña estilo di un “challenge” (reto) riba Facebook kaminda bo por a graba bo mes ta wapa na kas i despues subi esaki riba Facebook. Ora subi esaki riba faceboook mester a nominá famia i amigunan pa nan tambe hasié i asina e por a bira ‘viral’ i krea un union digital. Por a mira partisipashon di diputado Nina den Heyer, yùfrou Chèmi, Miss Tourism Bonaire 2019, ganadó di Kanto Krioyo 2019 i diferente hende mas. Tambe a krea un "frame" pa “profile picture” di Facebook, kaminda tur hende for di 28 di aprel 2020 por a kambia nan "profile picture” den unu ku e kolónan di e bandera di Rincon, deseando nan amigunan un Felis Dia di Rincon.


Por último, pa selebra e di tres aña di Boneiru komo un “Blue destination” e grupo di "taskforce" a djòin forsa huntu ku One Hour Clean Up Power i tambe Junior Rangersnan di STINAPA pa asina limpia kosta di Playa grandi. E grupo di "taskforce" di Blue Destination ta organisá diferente aktividat ku e meta pa konsientisá e pueblo Boneriano pa partisipá aktivamente den inisiativanan pa mantené Boneiru komo un Blue Destination. Riba e di tres aniversario di Boneiru komo un isla "Blue" Nashonnan Uní ta selebrá Dia Mundial di Oséano i den kuadro di esaki riba djasabra 13 di yüni for di mitar di 10 pa mitar di 11 di mainta lo tin un "One Hour Clean Up" na Playa Grandi. Diferente "stakeholders" lo partisipá i tambe kualke persona ku kièr djòin por hasi esaki. Nos ta konsehá pa usa krema kontra di solo, bini ku bo bòter di awa re-usabel, brel di solo i pèchi, tin un bon sapatu será òf kèts na pia i enkurashá bo amigunan i famianan pa bini huntu ku bo. Lo bai tin handschoen disponibel òf bo por trese di bo mes si bo tin.


Finalmente, nos por konkluí riba un aña mas ku tabata eksitoso! Grupo di Blue Destination ta kontentu ku e logronan ku a logra kaba i ta optimista pa e futuro di Boneiru komo un isla inkluso ku e komunidat i den balansa ku su ekonomia, kultura i naturalesa pa lokual ta trata progreso i union kolektivo pa logra metanan fruktífero pa nos isla.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com