click

PLAY 

Boneiru ta un frontrunner den region di karibe

Boneiru ta disponé di un bon posishon pa bira e frontrunner den region di karibe. Esaki segun Economisch Bureau Amsterdam den e rapòrt ‘Kleine eilanden, Grote uitdagingen’ tokante e perspektiva ekonomiko di e partinan karibense di Reino. Esaki ta loke ku ta bini dilanti den e revista ‘Bon bini Bonaire’.


Tweede kamer a duna e enkargo pa hasi e investigashon aki. Parlamentu kier a investigá e posibilidatnan i solushonnan pa e islanan, kompará ku e otro islanan den karibe.


Ku e konsepto di Blue Destination Boneiru ta bai den direkshon di desaroyá un ekonomia blou. Ku e palabrashonnan ku a hasi den e Bestuursakkoord entre Boneiru i Hulanda, e konosementu i medionan finansiero ta bini disponibel pa realisá e desaroyo di e ekonomia blou, segun e investigadornan ku ta konkluí ku Boneiru tin e potensial pa desaroyá su mes komo un lider den region riba tereno di ekonomia duradero. E investigadornan ta bisa ku e konsepto di Blue Destination ta reforsá e kapasidat propio di Hulanda karibense pa produsí entrada. Coronacrisis ta enfatisá e importansha di esaki. Banko mundial i Nashonnan Uní ta mira desaroyo di e blue economy komo e miho strategia pa paisnan karibense realisá kresementu di prosperidat.


Blue economy, esta uso duradero di rekursonan natural pa kresementu ekonomiko i mehorashon di situashon di bida di hendenan, ta e reseta pa Small Island Developing State en general i e region di Karibe en partikular pa realisá un ekonomia inklusivo, kombatí pobresa, realisá diversifikashon ekonomiko i pa inová, segun e rapòrt. Hulanda karibense, kompará ku e region, a pasa den nu desaroyo sosial ekonomiko faborabel den e dékada ku a pasa; kresementu ekonomiko, bahada di desempleo i oumento di forsa di kompra. Banda di esei a hasi invershon grandi den kuido, enseñansa i infrastruktura.


E echo ku kosnan ta bai asina bon na e islanan BES kompará ku otro islanan den karibe ta parsialmente danki na e invershonnan ku a hasi den energia duradero, entro otro ku ayudo di supsidio i aporte di Reino, segun e raport. Na 2018 e porsentahe di energia produsí di forma duradero na Boneiru, St. Eustatius i Saba tabata respektivamente 33, 45 i 17 porshento. E porsentahenan aki a sigui oumentá. Boneiru, St. Eustatius i Saba ku esaki ta kualifiká nan mes komo é islanan duradero di region di karibe. 

Ekonomia di Boneiru a krese entre 2012 i 2016 ku un averahe di 2.3%. Desempleo ta di forma konsistente relativamente abou ku 6.5%. A pone un base fuerte pa kresementu ekonómiko struktural den e periodo ku ta bini, segun e rapòrt.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com