click

PLAY 

Cft ta enfatisa ku Boneiru mester mehora e siklo di presupuesto

Cft a duna un konseho positivo pa e di dos kambio di presupuesto pa 2020. Ta hisa e presupuesto ku 4.3 mion dollar, i esaki ta bira 87.5 mion na gastu i na entrada. E resultado ku ta spera pa 2020 no ta kambia, esta resultado nihil (e gastu ta mesun tantu ku entrada).


Cft den su karta na Kolegio Ehekutivo di Boneiru ta trese dilanti ku riba 2 di april a entregá e di dos kambio di presupuesto. Pa Cft esaki no a kumpli ku artíkulo 19, insiso 2 di Lei FinBES. Riba 29 di april a entregá e promé reportahe di ehekushon di 2020, pero esaki no tabata konsistí di un kambio di presupuesto. Cft den su reakshon un biaha mas a rekordá Kolegio Ehektuivo pa riba término korto entregá un kambio di presupuesto pa 2020. Kolegio Ehekutivo a reakshona bisando ku mas tarda 30 di yüni lo entregá e di dos kambio di presupuesto adaptá. Riba 29 di yüni a pidi pa posponé esaki te 8 di yüli. Riba 9 di yüli Cft a risibí e kambio di presupuesto aki.


Cft ta bisa di ta konstatá ku e proseso aki, meskos ku entréga di e promé kambio di presupuesto 2020, ta dura muchu largu. Cft ta enfatisá un biaha mas e nesesidat pa mehorá e siklo di presupuesto.


Pa loke ta e di dos kambio di presupuesto, Cft den su konseho ta remarká ku no a hinka e pèrdida di entrada ku ta spera komo konsekuensia di e krísis di covid-19, ounke ku Cft a pidi esaki. No ta konosi ainda ki sosten finansiero gobiernu di Reino lo duna pa kompensá e pèrdida di entrada aki. Pesei aworaki Cft ta konsehá pa despues ku e haltura di e pèrdida di entrada i e sosten finansiero ta konosí, pa hinka esaki den presupuesto via di un kambio di presupuesto.


Despues di aprobashon di e di dos kambio di presupuesto OLB a reservá 4 mion dollar pa por atendé ku e konsekuensianan di e krísis di covid-19. Esaki ta komplementá e medidanan di sosten direkto di gobiernu di Reino na prinsipalmente empresarionan, entre otro pa evitá retiro. Cft ta konsehá Kolegio Ehekutivo pa sòru pa responsabilisashon mensual tokante e uso di e 4 mion dollar i ku esaki ta inkluí e uso ku ta spera di hasi di esaki pa e sobra lunanan di 2020.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com