click

PLAY 

Cft ta pidi gobiernu di Boneiru pa entregá kuentanan anual di 2019 di entidatnan pa mas tardá dia 1 di ougùstùs benidero

Den un karta dirigí na presidente di Kolegio Ehekutivo, gezaghebber Edison Rijna, e presidente di Cft BES, Raymond Gradus, ta mustra ku e lei finansas di Entidatnan Publiko Boneiru, Saba i Sint Eustatius ta stipulá ku Kolegio Ehekutivo pa mas tardá 30 di yüni mester pone e kuentanan anual di e aña anterior di entidatnan  di gobiernu na disposishon di Cft. Ainda Cft no a risibí e kuentanan anual di 2019. Tambe di añanan anterior Cft no a risibí e kuentanan anual di diferente entidat.


E presidente di Cft ta bisa gezaghebber ku mas biaha Cft a mustré riba e deadline pa entrega di kuentanan anual di e entidatnan di gobiernu. Bou di entidatnan di gobiernu Cft ta komprende:

e kompanianan di kua gobiernu ta akshonista;

e entidatnan ku ta pertenesé na e sektor kolektivo;

un kantidat di otro entidat selektá a base di interes gubernamental i finansiero.                                                                                                                        


E deadline a pasa entre tantu sin ku Cft a risibí tur e kuentanan anual ku a pidi. E echo ku no tin kuentanan anual  di 2019 di e kompanianan ta kondusí na ku accountant no por duna seguridat di e balorashon di e kompanianan di gobiernu den e kuenta anual di gobiernu di 2019, meskos ku ta e kaso ku e kuentanan anual di e añanan anterior.


E lei finansiero BES ta stipulá ku e asina yamá “rentelastnorm”  pa e sektor kolektivo di e entidat públiko mester ta un averahe di 0 porshentu pa aña presupuestario. Pa por evaluá e “rentelastnorm” Cft  mester disponé di e sifranan preliminar di 2019 di e entidatnan den e sektor kolektivo dia 1 di yüli 2020.


Di e nuebe entidatnan ku ta forma parti di e sektor kolektivo, Cft no ta disponé di e sifranan preliminar di 2019 di ningun di e entidatnan. Pa motibu ku no tin sifra di esakinan no por saka e “rentelast”  i no por stipulá ku ta kumpli ku e “rentelastnorm”. E nuebe entidatnan ta Bonaire Holding Maatschappij, Bonaire Overheidsgebouwen n.v., Tourism Corporation Bonaire n.v., Bonaire Wagenpark n.v. i Bonaire Management Group n.v. i e fundashonnan Stichting Beheer en Exploitatie Sportterreinen, Stichting FINEB, Fundashon sedrebo i Fundashon Marcultura.

A base di e lei finansiero BES, Cft tin e tarea legal pa raportá na e minister di BZK tokante e sifranan preliminar di e sektor kolektivo. Cft ta pidi gezaghebber pa sòru pa por entregá e kuentanan anual di e entidatnan aki ainda pa mas tardá 1 di ougùstùs bendero.


Cft ta bisa ku tin un kantidat di entidat di gobiernu ku ta konosí serka e instansia aki ku  no ta pertenesé na e sektor kolektivo. Di nan tambe falta e kuentanan anual. Aki tambe Cft ta pidi gezaghebber pa aktualisá e lista ku Cft tin di un kantidat di entidat ku no ta aktivo a base di e kuentanan anual ku ta den poder di Kolegio Ehekutivo i tambe e kuentanan anual ku falta ainda te ku 2019. Esaki mester sosode mas pronto posibel i pa mas tardá 1 di ougùstùs benidero. Tur mester ta na disposishon di Cft.

Cft ta bisa di lo aktualisá e listanan di e entidatnan a base di e informashon ku nan risibí di gobiernu di Boneiru.


E kompanianan ku Cft ta menshoná ku no ta pertenesé na e sektor kolektivo ta: Bonlab, Selibon, Telbo, Ontwikkelingsbank Nederlandse Antillen, BIA, OTB, i WEB. E fundashonan ta: Fundashon Fondo pa Kaminda Boneiru, Fundashon Cas Bonairiano, Stichting Diatel Bonaire, Fundashon Karpata, Bonaire International Sailing Regatta, Fundashon Wega di Number, Stichting Openbaar Onderwijs Bonaire, Stichting Kadaster en Openbare Registers Bonaire i Stichting Monumentenfonds Bonaire.


Di tur e entidatnan ku Cft ta menshoná riba e dos listanan, mester bisa ku di dos di nan sigur a sali den publisidat ku nan relato anual di 2019 ta kla i ku gobiernu a risibí esaki ta e relatonan di Fundashon Cas Bonairiano i WEB.

Fundashon Cas Bonairiano a publiká su relato di 2019 pa tur hende por tuma nota di dje.

Di Fundashon Cas Bonairiano nos tin informashon ku Cft a pidi diskulpa, pasobra Cft tin e relatonan anual di 2018 i 2019 debidamente den nan poder. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com