click

PLAY 

Derechi penal hubenil ta drenta na vigor pa Hulanda Karibense

For di promé di ougùstùs 2020 e derechi penal hubenil ta drenta na vigor na Hulanda Karibense. Loke ta karakterisá e derechi penal hubenil ta e enfoke pedagógiko. Esaki ta nifiká straf- i medidanan pa hóbennan for di 12 te 18 aña ta basá riba influensiá komportashon di un forma positivo, re-edukashon i prevenshon di e komportashon kastigabel.


Ku e introdukshon di derechi penal hubenil ta bini mas posibilidat adaptá pa hóbennan den e kadena hudisial hubenil, pa asina atendé ku komportashon kastigabel. Partinan importante den e kuadro aki ta e re-introdukshon di Halt, e introdukshon di detenshon hubenil i e kordinashon di servisio komunitario i e supervishon riba kondishonnan speshal dor di rehabilitashon sosial.


Prevení antesedente penal

Ora ta trata delitonan menor manera, destrukshon, falta skol òf kore sin reibeweis, polis por referí e hóben pa Halt. Einan e hóbennan ta haña e oportunidat pa drecha nan komportashon kastigabel. Dor di hiba kòmbersashonnan, ehersé trabou i tareanan edukativo i pidi despensa na e víktima, Halt di e forma aki ta trata pa stòp komportashon penal di hóbennan mas trempan ku ta posibel. Dor di finalisá henter e trayektoria di Halt un hóben ta prevení di haña antesedente penal.


Delitonan serio

Den kaso di delitonan serio manera, maltrato òf violensia, Ministerio Públiko por disidí pa persiguí un hóben. Voogdijraad ta hasi investigashon tokante e pasado di e hóben i ta konsehá e fiskal di Ministerio Públiko, kua kastigu ta pas mihó pa e hóben. Hues ta disidí na final ku kastigu e hóben ta haña.


Hues por imponé un multa òf detenshon hubenil pa e hóben. E delaster opshon ta un enkarselashon speshal pa hóbennan ku a kometé un delito pisá. Hues por imponé e kastigu tambe di un forma kondishonal. Den e kaso aki esei ta tuma lugá bou di kondishonnan speshal. Si dado kaso e hóben bolbe kometé un delito òf e no tene su mes na e kondishonnan, hues por disidí ainda di pone e hóben den detenshon hubenil. Riba e departamento hubenil di prizòn tin otro reglanan for di e adultonan. Un ehèmpel ta ku no tin mag pone menornan den konfiamentu solitario.


Kondishonnan speshal ku por imponé pa hóbennan ta por ehèmpel servisio komunitario, tratamentu obligatorio òf toke de keda. Rehabilitashon Sosial ta kordiná e servisio komunitario nan i ta sòru pa hóben tene su mes na e kondishonnan speshal. Mayoria biaha ta apuntá e hóben  na un guiá di rehabilitashon sosial di Jeugdzorg. E meta ta pa tene e hóben riba e kaminda rekto i pa sòru ku e no ta kometé mesun fayo atrobe. Si logra esaki e ta bon pa tantu e hóben komo e sobra di komunidat.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com