click

PLAY 

Diálogo Sentral ta kontentu ku desishon pa prolongá pakete di medida 

Diálogo Sentral di Boneiru ta kontentu ku gabinete Hulandes a duna oido na e petishon di e diálogonan sentral di Boneiru i Sint Eustatius pa prolongá e medidanan di sosten di krísis pa e islanan di Hulanda Karibense. Ku esaki, gabinete a inkorporá tambe e sugerensianan di e diálogonan sentral pa amplia e pakete aktual ku sierto medida ku ta vigente kaba na Hulanda Europeo, teniendo kuenta alabes ku e situashon spesífiko di kada isla. 


Diálogo Sentral ta un plataforma formá pa dunadónan di trabou, sindikatonan, Kámara di Komersio i gobièrnu lokal, ku partisipashon di e unidat di Asuntunan Sosial i di Labor (SZW) di RCN komo konsehero. E órgano aki ta aktivo for di novèmber 2018 den su konstelashon aktual. Despues ku e krísis di korona a surgi i no por a biaha pa Boneiru, a pidi diputado Elvis Tjin-Asjoe pa temporalmente tuma e funshon di vise-presidente suplente. Durante di e reunionnan presidí pa diputado Tjin-Asjoe, a forma dos grupo di trabou. Un grupo di trabou a atendé ku e medidanan di sosten i a duna input pa e karta ku e diálogonan sentral di Boneiru i Sint Eustatius a manda huntu, den kua a hasi e proposishonnan ku awor a keda honrá dor di gabinete Hulandes. E segundo grupo di trabou ta traha riba senarionan di rekuperashon sosial i ekonómiko pa prepará pa re-apertura di e isla. 

Diálogo Sentral di Boneiru i “Central Dialogue” di St. Eustatius a proponé un prologashon di e medidanan di sosten te ku fin di aña aki. Gabinete a disidí pa prolongá te ku 12 di òktober benidero, sinembargo Diálogo Sentral ta spera ku si e situashon ta rekerí esaki lo por konsiderá pa alargá esaki ainda te fin di aña, dependiendo di e desaroyonan. 


Segun vise-presidente suplente Tjin-Asjoe: “Danki na e bon koperashon i akshon desisivo den Diálogo Sentral nos a logra pa hasi un análisis rápido di tur medida i vosiferá e nesesidat di tantu empresanan komo sektor laboral den un forma konvisente. Nos ta kontentu ku gabinete a sigui nos proposishonnan. Esaki ta demonstrá un bes mas e forsa di e forma di kolaborashon aki.” Na nòmber di Diálogo Sentral e ta ekspresá e konfiansa ku e medidanan di sosten lo kontribuí konkretamente na un start nobo i balansá di aktividat ekonómiko, ora ku ta responsabel pa habri Boneiru pa bishitante atrobe.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com