click

PLAY 

Diferensia di opinion entre politika i Ben Oleana pa pone ordu den kompanianan di gobiernu a poné tuma retiro for di Holding

Manera diputado i lider politiko di MPB, Elvis Tjin Asjoe, a deklara den Konseho Insular, Ben Oleana lo retira komo direktor di Bonaire Holding Maatschappij fin di e luna aki, ayera Oleana a entrega su karta di retiro na hunta di komisario di Bonaire Holding Maatschappij pa medio di e presidente-komisario Karel Frielink.

Den su karta di retiro Ben Oleana ta bisa ku e i su tim a traha duru den e seis lunanan ku a pasa pa independisá i profeshonalisá e kompanianan yu di Bonaire Holding Maatschappij komo preparashon pa asina yega pa disolvé BHM.

Oleana ta bisa ku e no por a konta ku e sosten di e hunta di komisario di BHM ni tampoko di e akshonista ku ta Kolegio Ehekutivo. Komo esun ku ta responsabel pa tantu BHM komo e kompanianan i tambe responsabel pa daño na maneho di BHM, e no por hasi otro ku di entregá su funshon entrante 31 di mei.

Segun Ben Oleana, na interes di e ekonomia di Boneiru i tambe di e kompanianan mes, nan mester a kumpli ku kondishonnan básiko prome ku disolve BHM. Parti di esakinan ta bon maneho, nulmetingnan, situashon e.o. esun finansiero na ordu, huntanan di komisario ku ta funshona independiente i no mará politikamente segun e Kódigo di Corporate Governance. Ta parse segun Oleana ku aparentemente tantu e hunta di komisario di BHM komo e reunion general di akshonista  tin un otro opinion.

Den su karta di retiro e direktor temporal di Bonaire Holding Maatschappij ta bisa ku e opinion aki a sali bon i kla dilanti di parti di e hunta di komisario di Holding i miembronan di Bestuurscollege. Tabatin un diferensia fundamental  di opinion, bista i interpretashon  entre Oleana i su tim na un banda i hunta di komisario di Holding i Bestuurscollege na e otro banda pa loke ta trata e nesesidat di implementashon i ponementu di bon maneho den e kompanianan di gobiernu.

Komo ku ta trata aki di prinsipionan basiko na interes di Boneiru i e desaroyo di e entidatnan di gobiernu, Ben Oleana ta bisa ku e no por uni su mes ku e liña ku reunion   general di akshonista den koperashon ku e hunta di komisario di Holding  a stipulá. Esaki ta pa likidá Holding prome ku fin di 2020. Tur esaki ta pone Oleana konkluí ku e no tin konfiansa pa por sigui den e funshon.

Ben Oleana ta lamentá den su karta di retiro ku e no por traha mas pa Holding na interes di Boneiru. E ta bisa ku pa su konsenshi ela hasi tur loke ta posibel pa pone kosnan kana na ordu den e kompanianan di gobiernu i e mester konformá su mes ku esaki no a duna e resultado deseá.

Henter e dossier inkluso relato di tur e trabou ku e i su tim a hasi Oleana ta entregá na e akshonista i hunta di komisario di Bonaire Holding Maatschappij pa asina su susesor ku lo nombra por prepará su mes pa su tarea. 

Ben Oleana a drenta den funshon di direktor temporal di Bonaire Holding Maatschappij dia 1 di novèmber 2019 despues di tabata miembro di hunta di komisario di e kompania pa un tempu kortiku. Tur esaki komo persona di konfiansa di diputado i lider polítiko di MPB, Elvis Tjin Asjoe.



















Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com