click

PLAY 

Diversifikashon ta e ‘yabi’ den Plan di Rekuperashon di Turismo Boneiru

E próksimo simannan ta finalisá e asina yamá ‘Tourism Recovery Plan’ (plan di rekuperashon di turismo) ku tin komo meta pa aselerá rekuperashon di sektor turístiko, asina ku ta responsabel atrobe pa risibí turista. 

E último tempu ku aporte di stakeholdernan lokal, entre otro TCB, BIA i BONHATA, agensianan di biahe i kompanianan di aviashon, bou di direkshon di tim Masterplan 2030 a formulá un plan di akshon den forma di konsepto ku ta den liña ku e Plan Maestro Stratégiko pa Turismo i e seshonnan di Plan Maestro 2030 ku anteriormente a  dediká na turismo. Na mes momentu a sinkronisá e plan ku realidat di e époka despues di corona, den kua siguridat di tantu komunidat boneriano komo di nos bishitantenan ta para sentral.


Riba invitashon di Entidat Públiko Boneiru e stakeholdernan for di sektor turístiko a asistí na un presentashon di e ‘Concept Tourism Recovery Plan’ (konsepto di plan di rekuperashon di turismo). Gezaghebber Rijna tabata e promé orador ku a hiba palabra. El a informá e presentenan ku durante e próksimo dianan e Team di Maneho Insular ta konsultá ku vários eksperto (entre otro di e Instituto di Reino pa Salú Públiko i Medio Ambiente – RIVM) tokante ki dia i bou di kua kondishon ta habri frontera bèk. Toma di desishon tokante esei ta tuma lugá riba djarason próksimo. Konsehero di portofolio Hennyson Thielman a splika ku na momentu di traha e plan di akshon a hasi uso tambe di investigashonnan internashonal di eksperto tokante kon turismo lo bai desaroyá su mes durante e añanan binidero. A base di tur informashon disponibel a desiñá un maneho ku ta enfoká riba tres aspekto:

    1.    Rekonstruí e merkado eksistente. 

    2.    Diversifikashon di e oferta turístiko pa hasi Boneiru (mas) atraktivo pa bishitantenan ku un patronchi di gastamentu mas haltu ku promedio i ku ta skohe konsientemente pa eksperensiá aktivamente e ‘Bonaire Experience’.

    3.    Alsa enbolbimentu di komunidat ku turismo mediante desaroyo di aktividatnan lokal kultural i outéntiko ku ta laga turistanan eksperensiá e ‘berdadero Boneiru’.


Diputado di Turismo Elvis Tjin Asjoe a alegá ku e krísis di corona ta ofresé Boneiru e oportunidat pa den un forma aselerá hasi e transakshon deseá di turismo masal pa turismo di kalidat, loke ta kuadra ku e aspirashon pa yega na un komunidat sostenibel ku mantenshon di kultura i naturalesa konforme e konsepto di Blue Destination. Kolegio Ehekutivo a reservá medionan pa ehekushon di e Plan di Rekuperashon di Turismo. Pa finansiamentu mas aleu i ekspertisio adishonal Kolegio Ehekutivo ta konsultá ku e ministerionan konserní i Union Oropeo. Awor na promé lugá ta bai prosesá e reakshonnan i sugerensianan ku e stakeholdernan ku tabata presente a trese dilanti, pa despues mas pronto posibel presentá e vershon definitivo di e Plan di Rekuperashon di Turismo  na Konseho Insular. Despues di aprobashon lo integrá e plan aki den Plan Maestro 2030 ku mas lat den e aña aki lo keda presentá.               


Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com