click

PLAY 

Enkuesta polítiko ta mustra ku Nina den Heyer ta e diputado mas popular

Nina den Heyer ta e diputado mas popular na Boneiru. Esaki por konkluí for di un enkuesta polítiko, ehekutá dor di e ofisina di Linkels & Partners. 

Riba e pregunta “Kiko ta bo opinion tokante e diputadonan”, 55,6% di e respondentenan a indiká di tin un opinion positivo di Nina den Heyer komo diputado, 27% a indiká ku nan ta ni positivo, ni negativo i 12,5% a indiká ku nan ta tin un opinion negativo di Den Heyer. 

Pa loke ta trata diputado Elvis Tjin Asjoe 31% di respondente a indiká ku nan tin un opinion faborabel di e diputado, 30,9% a indiká ku nan ta ni positivo, ni negativo i 32% a indiká ku nan tin un opinion negativo. 

Den kaso di diputado James Kroon 13,9% a indiká ku nan tin un opinion faborabel, 37% a indiká ku nan ta ni positivo, ni negativo i 38,6% a indiká ku nan ta negativo. 

Den e enkuesta a pidi partisipantenan tambe pa duna un sifra, komparabel ku un ‘rapportcijfer’ na e diputadonan. Aki Den Heyer a skor un 6.9, Tjin Asjoe a skor un 5.6 i Kroon a skor un 4.7. 

Komentario 

Segun Harald Linkels, ku tabata na enkargo di e enkuesta, tabata tin espasio tambe pa respondentenan duna komentario tokante kada un di e diputadonan. Segun Linkels, ora ta trata di Den Heyer hopi hende a kontestá ku e ta un hende ku bo sa kiko e ta para p’e i ku por konsideré komo un ehèmpel pa hende muhé den nos komunidat. Di otro banda tambe ta skucha ku e diputado mester ta mas desisivo i ku e mester para mas duru pa loke ta trata su opinión, ora e no ta di akuerdo ku su koleganan maskulino, ku ta Tjin Asjoe i Kroon. 

Pa loke ta trata Tjin Asjoe respondentenan a indiká ku tin e impreshon ku e diputado no semper ta hasi loke e ta bisa, ku e ta hopi enfoká riba relashonan publiko (manera sakamentu di pòtret di kosnan ku e ta hasi). Tambe tin respondente ku ta pensa ku Tjin Asjoe ta muchu enfoka riba Aruba i ku e ke konvertí Boneiru den un isla di turismo masivo. Di otro banda, loke ta apresiá di Tjin Asjoe ku ela trese stabilidat den polítika i ku e sa di tene su tim huntu. 

Ora ta trata di diputado James Kroon hopi respondente ta remarká ku nan ta mira James Kroon komo e diputado mas suak den e 3 diputadonan i ku Kroon hopi biaha ta parse dirigí riba su propio interesnan. Otro komentario ta ku James Kroon hopi biaha a bai di akuerdo ku proyektoman ku a hasi daño na nos naturalesa. 

Komentarionan positivo di Kroon ta ku diferente respondente ta pensa ku den e kolegio ehekutivo aktual Kroon ta presta mihó ku den kolegionan ehekutivo anterior i ku e ta un hende loyal na su koleganan di e tim. Tambe diferente respondente ta indika ku e ta un ‘homber di pueblo’ i ku e sa kiko ta biba den pueblo i ku e ta e diputado ku mas eksperensia den e tim. 

Den e dianan benidero por spera mas resultado di e enkusta ehekutá pa Linkels & Partners. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com