click

PLAY 

Enkuesta tokante plèstik ku ta usa un biaha so na ‘Taste of Bonaire’

Fundashon Limpi i Bunita, Clean Coast Bonaire i Boneiru Duradero (BD) a uni forsa pa dia 1 di ougùstùs hasi un investigashon na ‘Taste of Bonaire’ di TCB relashoná ku plèstik ku ta usa un biaha so. E organisadónan di e enkuesta ta spera ku bishitantenan di e evento festivo aki ta dispuesto pa partisipá na un enkuesta tokante uso di plèstik ku ta dura 2 minüt. 


E partisipantenan na e enkuesta ta haña 6 pregunta simpel i nan ta risibí un tas reusabel GRÁTIS komo gradisimentu pa nan koperashon. Boneiru Duradero ta kurioso pa sa si habitantenan di Boneiru ta haña informashon tokante e intenshon di gobièrnu pa den futuro serkano prohibí plèstik ku ta usa un biaha so. Ta puntra e partisipantenan tambe kua ta e artíkulonan di plèstik ku nan ke prohibí i si nan ta separá plèstik for di otro shushi doméstiko. 


Entidat Públiko Boneiru ta trahando riba desaroyo di un prohibishon legal di plèstik ku ta usa un biaha so. Na aña 2018 Boneiru a aprobá un moshon pa prohibí plèstik ku ta usa un biaha so i na aña 2019 diputado James Kroon i e minister hulandes di medio ambiente Stientje van Veldhoven a firma un deklarashon di intenshon.


Na aña 2019 Boneiru Duradero a traha huntu ku Entidat Públiko Boneiru pa organisá enkuentronan di stakeholder pa sektor privá tokante kon Boneiru por pone ‘Beyond Plastics’ move. For di enkuentronan aki a resultá ku bou di empresanan na Boneiru tin sosten ámplio pa un prohibishon di plèstik ku ta usa un biaha so. Sinembargo ta importante tambe pa haña sa si nos hendenan komun i koriente na Boneiru ta konsiente di e importansia di redukshon di plèstik. 


Lo pone e enkuesta tokante plèstik ku ta usa un biaha so disponibel ‘online’ via e páginanan di Facebook di Boneiru Duradero, Clean Coast Bonaire i Selibon. E organisadónan ta agradesido na Tourism Corporation Bonaire pa nan koperashon. Fondo di Naturalesa Mundial – Wereld Natuur Fonds – di Hulanda ta finansiá tantu Boneiru Duradero komo Clean Coast Bonaire. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com