click

PLAY 

Glenn Thodé miembro nobo di Cft di Bonairu, Sint Eustatius i Saba

Konseho di Ministro di Reino a nombra dr. Glenn A.E. Thodé riba 19 di yüni 2020 komo miembro di Cft riba proposishon di e entidatnan públiko Bonaire, Sint Eustatius i Saba entrante 1 di yüli 2020. E ta sigui señor Herbert Domacassé, kende su periodo ta vense 1 di yüli 2020.

Señor Thodé a yega di ehersé diferente funshon na Bonaire i Aruba. For di aña 2012 e ta rector di Universidat di Aruba. Promé ku esei e tabata Gezaghèber di Bonaire di 2008 te 2011: e promé añanan di Teritorio Insular di Bonaire i for di òktober 2010 di Entidat Públiko Bonaire. 

Na komienso di su karera - di 1992 te 1998 - señor Thodé tabata aktivo komo instruktor di software i atministradó di sistema. Despues di su estudio di lei el a kontinuá su karera durante di mas ku dies aña den e mundu akadémiko, den kua e tabata traha na Universidat di Aruba i Rijksuniversiteit Groningen, entre otro komo dosente, kolaboradó sientífiko (prinsipal) i rector interino. Na 2006 el a doktorá na Rijksuniversiteit Groningen. 

Riba un término korto Glenn Thodé lo bira miembro di direktiva di Stichting Scholengemeenschap Bonaire. Entrante e aña aki e ta presidente di Stichting Nature Trust i for di 2017 e ta presidente di Konseho Elektoral di Aruba. Banda di esaki, for di 2014 e ta dirigí e Komishon di Supervishon di Protekshon di Dato Personal di BES den e funshon di presidente.

Anteriormente el a yega di okupá vários otro funshon sosial. El a yega di ta presidente di Hunta di Supervishon di Fundashon di Fondo di Penshon General di Aruba i presidente di e Komishon di Guia di Evaluashon di e Leinan di Konsenso di Reino di Hustisia i di e Komishon di Konseho SGB pa asesorá Sekretario di Estado i Miniser di Enseñansa, Kultura i Siensia. Tambe e tabata miembro di e Komishon di Evaluashon di Struktura Estatal di Hulanda Karibense (Komishon Spies).

Presidente prof. dr. Raymond Gradus ta gradisí señor Herbert Domacassé pa e kolaborashon plasentero i su dedikashon pa supervishon finansiero di e islanan di Hulanda Karibense. Di mes forma señor Gradus ta spera di bai traha bon ku señor Glenn Thodé tambe.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com