click

PLAY 

Hefe di finansas ta bai okupá otro funshon

Awe ta ultimo dia di trabou di e hefe di e sekshon di finansas di Entidat Publiko Boneiru, Dudley Wedervoort, den e funshon aki. E funshon aki ta unu importante den e aparato gubernamental di gobiernu di Boneiru, ya ku e hefe di finansas ta esun ku ta aprobá i ta firma pa tur salida di gobiernu por tuma lugá. Dudley Wedervoort a drenta sèrvisio di gobiernu di Boneiru den e funshon di hefe di finansas riba 23 di òktober 2017, despues ku pa hopi tempu no tabatin un persona nombrá fiho den e funshon ei. Tur e tempu ei gobiernu tabata traha ku hefenan interino.


No ta konosí kiko ta e motibu ku Dudley Wedervoort ta bai for di e funshon di hefe di finansas. E lo keda den e aparato gubernamental i lo bai okupá un funshon den e “bureau” di diputado di finansas i asuntonan ekonómiko Elvis Tjin Asjoe. Komo eksperto finansiero Wedervoort lo bai traha entrante djaluna awor riba e proyekto di belastingnan lokal. Tambe e lo ta enkargá ku proyekto ekonómiko pa gobiernu di Boneiru.


Te awe gobiernu no a habri vakatura pa e funshon di hefe di finansas. Esaki ta un indikashon ku ta ku tur probabilidat lo bin un hefe interino atrobe na e funshon importante aki.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com