click

PLAY 

Kompañá pa sekretario di USIBO, sindikato Fedebon a bishita ofisialmente 

henter Kolegio Ehekutivo djarason

Fedebon a trese hopi kla dilanti ku mester hasi tur esfuerso pa tene BOPEC habrí i operashonal. Bou di e lema ‘BOPEC tin futuro’, a presentá un posibel solushon pa e situashon ku BOPEC ta den i ku por lo pronto no ta mustra ku tin un solushon. E solushon ku a presentá ta unu kaminda PDVSA ta keda doño di e terminal i ku un posibel kontinuashon di e operashon lo no violá e blokeo di parti di Merka i lo mester kumpli tambe ku e standartnan internashonal ku ta rekerí pa un terminal di almasenahe. Opviamente e punto kardinal ku Fedebon a trese ta mantenshon di e kuponan di trabou i ku e posibilidat pa habri hopi kupo di trabou dado kaso yega na un akuerdo pa loke ta trata "upgrading"di e terminal. 


Di parti di gobiernu nan a risibí e proposishon ku un mira positivo i a hasi diferente pregunta pa haña klaridat tokante henter e proposishon. A palabrá ku e proposishon lo bai pa e órganonan di konsulta ku Kolegio Ehekutivo a instalá pa loke ta trata henter e problematika di primi riba kònòpinan korekto i pa konkluí ku lo mester bai un segunda tanda di kombersashon. Fedebon na e mesun momentu a hala atenshon di gobiernu pa no pèrmiti por lo pronto pa duna pèrmitnan di trabou, i tambe tuma akshon kontra trahadonan ku ta indokumentá riba nos isla i ku posiblemente ainda ta riba payroll di BOPEC. Mirando e echo ku a trata aki di un proseso delikado, kaminda interesnan grandi ta hungando un ròl, Fedebon lo no por duna mas detaye di e enkuentro ku no ta te ora ku tin informashon konkreto. 


Pa loke ta kiko ta bai pasa despues di 30 di yüni, Fedebon ta den un insertidumbre ya ku su petishon pa risibi informashon tokante e escrow-account no a keda honra ya ku e sindikato no ta partido ennolbi den e lisensia. Mester keda alerta si. Entre tantu e sindikato a risibí informashonnan di parti di su hurista/konsehero Hose Figaroa riba loke a pidie pa averigua i ku ta informashonnan ku no por subi kaya. Fedebon kier pidi tur su miembronan pa den nan forma por laga yega na konosementu di mandatarionan ku BOPEC tin futuro i ku ta spera esfuerso di nan parti pa tene Bopec den operashon, mirando su balor agregá grandi na ekonomia di nos isla i pa garantisá kuponan di trabou. Aun mas importante BOPEC su presensia i operashon ta na Boneiru, awor ku nos ta pasando den un krisis serio kaminda no por permiti mas kupo di trabou bai pèrdí.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com