click

PLAY 

LVV mester bai sòru pa nos por produsí nos mes kuminda

E situashon di krisis ku nos ta den aktualmente ta mustra kon importante ta pa nos mes por produsí nos kuminda. Gobiernu di Hulanda huntu ku gobiernu di Boneiru ta trahando pa algun tempu kaba pa yega na produkshon di kuminda pa nos isla. Pa por yega na e produkshon aki gobiernu di Boneiru a nombra Maurice Adriaens den e funshon di hefe interino di e servisio di agrikultura, krio di bestia i peskería, LVV. E nombramentu aki a bin despues ku Adriaens a traha un rapòrt aña pasá tokante esaki riba enkargo di gobiernu di Hulanda.


Pa LVV por kumpli ku e tarea di produkshon di kuminda, mester reorganisá e servisio pa asina por duna konseho na kunukeronan i yudanan ku plantashon i krio di bestia. Tambe lo mester bai hasi uso di e tereno di LVV pa mustra kon e plantashon i krio di bestia mester sosodé, mientras ku lo repartí e tereno grandi di LVV di 50 hectare den parselanan pa hendenan ku ta interesá pa praktiká agrikultura i krio di bestia na un manera profeshonal. Banda di esei LVV lo mester sòru tambe pa desaroyo di peskería.


Maurice Adriaens ta konvensí ku nos mester por produsí nos mes kuminda aki na Boneiru i pa hasi esei e ta hasi kontakto ku organisashonnan manera Kriabon i Piskabon. Banda di esei e tin kontakto ku universidatnan na Hulanda i tambe ku e ministerio di agrikultura. Adriaens ta forma parti tambe di un grupo di Union Europeo ku ta para pa produkshon di kuminda pa Europa i islanan ku tin laso ku Europa.


Segun e hefe interino di LVV mester hasi uso di hightech i hasi uso mas efisiente posibel di tereno pa produkshon di kuminda. Riba e tereno di LVV tin awa resiklá i lo bai usa tambe awa di pos. Dentro di un aña lo ta posibel pa mira resultado di trabounan ku ta tumando lugá na e servisio di agrikultura, krio di bestia i peskería. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com