click

PLAY 

Mantenshon di lei di naturalesa i medio ambiente na 

Hulanda Karibense ta laga di desea

Segun e Konseho pa mantenshon di lei (“Raad voor de rechtshandhaving”), mantenshon di lei di naturalesa i medio ambiente mester ta hopi mas miho. For di investigashon di e Konseho a resultá ku na e islanan di Hulanda Karibense (Boneiru, Sint Eustatius i Saba) ta hasi tiki na supervishon i mantenshon di lei.

Organisashonnan ta wak kiko e otro ta hasi i ta traha tiki huntu, i empleadonan di entidatnan públiko ku outorisashon pa investigá no ta hasi uso di nan posibilidatnan pa kontribuí na mantenshon di lei. E Konseho ta menshoná e problemátika di kabritu komo ehèmpel. Na tur tres isla ta prohibí pa laga kabritu kana lòs pero niun di e islanan ta kumpli ku e prohibishon ei. E konsekuensianan pa vegetashon riba tera i pa e koralnan den laman ta desastroso. 

Tambe falta plannan di maneho preskribí pa lei, un responsabilidat di tantu entidatnan públiko komo gobièrnu di reino.

Polis, Ministerio Públiko, organisashonnan di protekshon di naturalesa lokal i entidatnan públiko lo mester palabrá konhuntamente ken ta responsabel pa kiko. Segun e Konseho no tin duda ku mester di esfuerso adishonal. Den su rapòrt e Konseho ta menshoná algun paso nesesario pa hisa nivel di supervishon i aplikashon riba tereno di legislashon di naturalesa i medio ambiente, i den su rapòrt ta duna pa esaki algun rekomendashon konkreto na e organisashonnan embolbí.

Den e investigashon e enfoke tabata riba un di e motibunan mas importante pa menasa di naturalesa riba i rondó di e islanan: bestia ku ta kana lòs. Tambe e Konseho a pone enfasis riba mantenshon di lei relashona ku prohibishon pa dùmp sushi. E bunitesa natural di e islanan ta e atrakshon prinsipal pa e turistanan di kua nos islanan ta pa un gran parti dependiente.

For di e investigashon a resultá entre otro ku ta trahando riba plannan pa trata e problemátika di kabritu, pero ku no tin of kasi no tin un kontinuashon riba e plannan. Pa loke ta trata kombatimentu di zwerfvuil e Konseho a konstatá diferensha grandi entre e tres islanan. Na Saba ta aktua imediatamente na momentu ku tin dùmpmentu di sushi ilegal, i e isla ta duna un impreshon partikularmente limpi. Na Sint Eustatius tin mehorashon den e forma kon ta atende ku e problema di dùmpmentu di sushi ilegal. Di otro banda Boneiru no a bira mas limpi den e último añanan i kontrol relashona ku prohibishon di dùmpmentu di sushi apénas ta tuma lugá.

Pa e vershon kompletu di e rapòrt klek aki òf konsultá ku e wèpsait di e Konseho: www.raadrechtshandhaving.com


Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com