click

PLAY 

Mariadal a fleksibilisá su areglo pa bishitante

Pa motibu di e medidanan di corona entrante e di dos mitar di luna di mei Fundashon Mariadal a introdusí un areglo estrikto pa bishitante. Awor ku gobièrnu a hala e ordenansa di emergensia aden i a fleksibilisá e medidanan, entrante djaluna 15 di yüni ta pèrmití mas bishitante drenta. E kantidat di bishitante ta keda limitá si, pa mas tantu posibel por mantené e ‘regla di 1,5 meter’. Ta ampliá e kantidat di bishitante na:

· tres pa kada pashènt pa Kas di Kuido;

· dos pa kada pashènt pa hòspital (Sentebibu);

· tres pa poliklínika pa mucha / pediatria (e pashènt i dos akompañante);

· dos pa e sobrá poliklínikanan (e pashènt i un akompañante);

· botika, laboratorio i e departamentu di radiologia ta sigui traha ku un sistema di karnèt.

Ta supliká hendenan ku tin keho di fèrkout pa keda kas. Fundashon Mariadal ta verwacht ku e adaptashonnan aki ta mas agradabel pa su pashèntnan i bishitantenan.


Naturalmente Mariadal ta konsiente di e echo ku e riesgo pa infekshon ku e vírùs di corona ta keda eksistí, no opstante tur medida den i pafó di hòspital. Pa e motibu aki hòspital ta keda prepará pa binida di e tipo di pashèntnan aki.


Awor ku biahamentu entre Hulanda i e islanan ABC ta posibel atrobe, spesialistanan médiko tambe por biaha pa Boneiru. Por lo tantu dòkternan di kas por bolbe traha karta di referensia pa e spesialistanan ku ta bishitá nos.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com