click

PLAY 

Mayoria partisipante na enkuesta politiko ta satisfecho ku Kolegio Ehekutivo

E grupo mas grandi di persona ku a partisipá na un enkuesta di e kompania di konsùltent Linkels & Partners ta bisa ku nan ta satisfecho ku e kolegio ehekutivo formá pa MPB ku UPB. 

43% di respondente a indiká ku nan ta sinti nan mes satisfecho ku e gobierno lokal, mientras ku 29% a indiká ku nan ta ni kontentu, ni malkontentu. 28% di esnan ku a yena e enkuesta a bisa ku nan no ta satisfecho ku e kolegio ehekutivo formá dor di e dos partidonan aki. 

1043 persona a yena e enkuesta ku a tene via di internet. Un análisis mas profundo di e kontestanan duná sin embargo a bin revelá ku un grupo partikular a purba di influenshá e resultadonan. Nan a yena e enkuesta 377 biaha dunando kasi e mesun kontesta, i sin yena sierto otro detaye. “Ora nos a deskubrí e patronchi aki, no a keda nos nada otro ku di eliminá e grupo aki for di e grupo total. Kontesta di 10 otro respondente tambe tabata un poko sospecho, aunque esakinan no tabata di e mesun grupo. A eliminá esakinan tambe, pa por a yega na resultadonan ku sí por a konfia. Asina a keda ku un grupo di en total 664 hende ku sí a yena e enkuesta manera debe ser”, asina Harald Linkels a splika. 

Ainda falta hopi trabou pa kaba di analisá i prosesá tur e informashonnan ku a akumulá. Segun Linkels, hendenan a hasi uso di e oportunidat pa elaborá i motivá nan kontesta i tin hopi informashon interesante den esaki. Linkels a primintí tambe ku den dianan benidero, kada bes lo publiká mas detaye di e informashonnan ku a akumulá pa medio di e enkuesta. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com