click

PLAY 

Muchananan ta yama turistanan bon biní bèk na Boneiru

Nos muchanan di skol básiko ta yama turistanan bon biní bèk na Boneiru. Nan ta hasi esaki ku algun frase den un video ku ta bai publiká riba diferente página internashonal na Europa i Merka pa bolbe atraé turista pa Boneiru.


Den e siman di 29 di yüni pa 2 di yüli gobièrnu di Boneiru a hinka un programa spesial den otro pa introdusí turismo na skol serka nos muchanan ku e meta ku nan tambe ta siña konosé e balor ku turismo tin pa nos isla. Entrante 2 di yüli Boneiru a bolbe kuminsá risibí turista oropeo despues di kasi 4 luna ku ni turista di Europa, ni esunnan di Merka por a bishitá nos isla. Parti di e programa na skol tabata pa graba un video na diferente sitio ku e muchanan. Den e video nan ta invitá e turistanan pa bolbe kuminsá bishitá Boneiru. Tambe e muchanan ta rekordá e turistanan di tur e kosnan úniko ku Boneiru so tin di ofresé. 


Diputado Elvis Tjin Asjoe enkargá ku turismo a keda sumamente orguyoso di mira ku na edat asina yòng kaba nos muchanan ta dominá e idioma ingles i kon bon nan a ekspresá esei den e video. Introdukshon di turismo na skol ta un prioridat den e plannan ku gobièrnu di Boneiru tin. Nos muchanan mester por komprendé importansia di e sektor aki i tambe mester por tin e oportunidat pa eksperensiá esaki pa nan mes. P’esei konhuntamente ku Ofisina di Turismo mester prepará nos muchanan pa esaki, pa nan tambe por forma parti di desaroyo di e sektor aki. 


Por mira resultado di e grabashonnan riba página di Facebook di Ofisina di Turismo i página di Facebook di gobièrnu di Boneiru. Tambe ta bai publiká e video serka partnernan internashonal di ofisina di turismo na Europa i Merka. E intenshon di esei ta pa atraé turista pa nos isla. Gobiernu di Boneiru i Ofisina di Turismo ta enkurashá tur hende pa kompartí e video aki ku nan amigu- i konosinan pa asina mas tantu hende posibel por mira e video. Di e manera ei sigur nos por logra nos meta di trese mas turista pa Boneiru. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com