Turista Merikano a fayesé despues di sambuya.
Stephanie Ann Russel, un damita Merikano nase 18 sèptèmber 1990 a fayesé djamars algu promé ku 12.00 despues ku ela bira malu durante sambuyamentu na e sitio di sambuya Karpata.
Ambulans a akudi na e sitio. Despues, na kaminda pa hospital e situashon di e víktima a empeorá. E víktima a pèrdè konosementu i no tabata reakshoná mas. E personal di ambulans mesora a kuminsá ku reanimashon, pero lástimamente e persona a fayesé. Na hospital un médiko a konstatá morto di e dama Russel.
Segun investigashon preliminar e víktima a bai sambuya ku famia i amigunan pa di dos biaha riba mesun dia. Durante e di dos biaha ela sinti su kurpa bira malu. Dor di esaki e víktima a sali for di awa. Einan su famia a yama liña di emergensia i pidi asistensia di ambulans i polis.
Por lo pronto polis no ta pensa ku ta un krímen a wòrdu kometé i pa e motibu aki e kurpa di e fayesido a wòrdu duna na su famia.

 

Preis di kombustibel ta subi entrante djarason.
Djarason promé di yüli 2009, preis di kombustibel lo subi. Ta trata aki di un subida supstansial riba preis di kombustibel. Subida internashonal di preis di kombustibel kombiná ku loke e gobiernu aktual ta yama 'debenan atrasá ku gobièrnu for di yanüari último no a atendé manera debe ser' a pone ku awor mester tin un subida tan drástiko.
Entrante djarason promé di yüli preisnan lo ta lo siguiente

Gasolin 92 oktan	NAfl. 1,88 pa liter
Gasolin 95 oktan	NAfl. 1,92 pa liter
Kerosin	NAfl. 0,96 pa liter
Gasoil	NAfl. 0,93 pa liter
Bom di gas 100 liber	NAfl. 43,48
Bom di gas 20 liber	NAfl. 9,67

 

 

 

 

 

Chaly Anthony representante di Boneiru den direktiva di ABVO.
Sindikato ABVO a tene elekshon djabierne ultimo pa elihi un direktiva nobo. Aki na Boneiru miembronan di e sindikato mester a elihi tambe un representante di Boneiru den e direktiva.
Tabata Chaly Anthony, ku 78 voto, ku a wordu elihi komo representante di Boneiru den direktiva di ABVO. Luti Balentien a sigui ku 53 voto, Theo Frans 42 I Rennie Winklaar 23 voto.
Wendel Calmes a wordu elihi komo presidente nobo di ABVO.

 

Homber a hoga na Sorobon.
Ayera nochi banda di kuartu pa nuebe, patruya di polis a keda dirigí na Sorobon kaminda un hòmber mester a bai bou di awa i no a bolbe bek na superfisio. Aya a sali na kla ku dos hòmber a bai pa hala un reda. E hòmber, Felix Pietersz (42) a baha na awa pa kue e reda. Dado momentu esun den awa a kuminsá grita pa yudansa i a bai bou di awa. E otro a baha inmediatamente na awa pa trata na yud’é, pero no por a hasi masha pasobra e no sa landa.
Dos agente polisial i un parkranger a baha rápidamente na awa. Banda di kuartu pasa di nuebe a lokalisá e víktima den fondo di laman i a hib’é tera kaminda a start un bes ku su reanimashon. Ambulans ku entre tantu a yega na e sitio a kontinua ku e reanimashon, pero a resultá ku no por a hasi nada mas pa e víktima. Dokter ku a presentá na e sitio, a konstatá morto. Riba òrdu di fiskal di ministerio públiko a tuma e kurpa den beslag pa hasi e investigashon korespondiente. Despues di kulminashon di e investigashon aki, e kurpa awe mainta a wòrdu duna liber na famia di e víktima.

 

Studiantenan di SBO a risibi nan diploma.
Djamars tabatin entrega di diploma na studiantenan di e sektor di SBO di Komunidat di Skol Boneriano. E evenementu aki a tuma lugá den patio di Kolegio Ehekutivo, i huntu ku diferente orador, diputado enkargá ku enseñansa Reynolds Oleana tambe a dirigí algun palabra na e graduadonan. Na final di su diskurso diputado Oleana a pidi pa para ketu na e kambionan ku ta bai tin den nos komunidat i ta spera ku kada un di e studiantenan por duna un aporte na un mihó Boneiru.
Pa loke ta e graduadonan mes, di e 59 studiantenan ku a pasa nan examen 50 a hasi esaki ku eksito, ku ta 84.7%.

 

Bishita di Bijleveld i Albayrak na Antia Hulandes i Aruba.
E siman akí e sekretarionan di estado Bijleveld di Asuntunan Interno i Relashonnan den Reino (BZK) i Albayrak di Hustisia ta pa un bishita di trabou na Antia Hulandes i Aruba. E bishita ta den kuadro di e kambionan estatal di Reino i e konsulta tripartit semianual di Hustisia.
E bishita di e mandatarionan a kuminsá djaluna, 22 di yüni, na Aruba. Bijleveld i Albayrak a hiba na Aruba kòmbersashon ku Gobernador di Aruba i ku promé minister Oduber. Sekretario di estado Albayrak a deliberá tambe ku minister di Hustisia Croes i a bishitá prizòn di Aruba. Djaluna atardi sekretario di estado Bijleveld a deliberá na Kòrsou ku promé minister antiano De Jongh-Elhage.
Djamars, dia 23 di yüni, e mandatarionan tin un enkuentro ku Gobernador di Antianan Hulandes, mr. Frits Goedgedrag. Ademas tin e dia ei riba agènda e konsulta tripartit di Hustisia. Anochi secretario di estado Albayrak ta tene un charla titulá ‘Managed Migration’, siguí pa un diskushon di foro riba migrashon.
Djárason, dia 24 di yüni, sekretario di estado Bijleveld ta partisipá na e Kumbre Polítiko riba e Proseso Estatal. E dia ei sekretario di estado Albayrak ta pa un bishita di trabou na Boneiru. Aya e ta sera konosí ku diferente persona i lo hasi un bishita na Huis van Bewaring. Na Boneiru e bishita di trabou di sekretario di estado Albayrak ta terminá.
Djaweps, dia 25 di yüni, Sekretaria di estado Bijleveld ta deliberá ku Gezaghebber di Kòrsou i ku Diputado di Salubridat Públiko riba refineria Isla. E dia ei e bishita di sekretario di estado Bijleveld ta terminá.

 

Aksidente laboral ku konsekuensha fatal.
Ayera mainta pa mas o menos 10.30 polis a wordu dirigi na poli di hospital pa un trahado aksidenta ku a wordu trese einan ku un vehikulo partikular. A resulta ku na un kas den konstrukshon na Sabadeco Shores un muraya di bloki parti paden a sukumbi i diferente parti a kai riba e trahador Luis Ernesto Corro Mendoza. Den situashon kritiko e la wordu transportá pa hospital. Na hospital dokternan a hasi tur lo posibel pa salba su bida, pero ela bin fayese a konsekuensha di gravedat di e leshonnan risibi.
Inspekshon di seguridat ta enkarga ku e investigashon di e kaso aki.

 

UPB ta keda den koalishon ku ta sostene gobiernu sentral.
Partnernan den koalishon di gobiernu sentral a tuma e desishon ku UPB ta keda forma parti di e koalishon. Despues ku Anthony Nicolaas a deklara su mes independiente den tantu gobiernu insular komo gobiernu sentral, Nicolaas huntu ku Aliansa Demokratiko Boneriano a hasi e petishon pa forma parti di e koalishon di gobiernu sentral tambe, despues di a forma un gobiernu nobo pa teritorio insular di Boneiru.
Despues di e desishon aki na nivel sentral Anthony Nicolaas a deklara ku e lo bai den oposishon den Parlamento Antiano.

 

Diputadonan nobo pa Kolegio Ehekutivo.
Djaluna, durante di reunion ku Konseho Insular den sala di Passangrahan gezaghebber mr. dr. Glenn Thodé a huramentá kuater diputado nobo pa Kolegio Ehekutivo di Teritorio Insular di Boneiru.
Ta trata aki di Marugia Janga, Pancho Cicilia i Nolly Oleana di Aliansa Demokrátiko Boneriano i Frensel Janga pa miembro independiente den Konseho Insular Anthony Nicolaas.
E kuater diputadonan aki a wòrdu skohé unánimamente ku sinku voto na fabor i sero kontra. Esaki despues ku e frakshon di UPB a bandona sala di reunion prome ku e votashon pa desapodera e diputadonan di UPB i tambe prome ku a vota pa e diputadonan nobo.
Di akuerdo ku miembronan nobo di Kolegio Ehekutivo, nan lo hasi nan máksimo esfuerso pa atendé ku nesesidat i interesnan di pueblo Boneriano den un forma digno i korekto, dunando den henter e trayektoria partisipashon amplio na tur sektor i gremio den komunidat.

Kontenido i resultado final pa e Struktura Estatal sigur lo wòrdu someté na konsulta popular. Pa loke ta trata repartishon di tareanan ta lo siguiente:

Gezaghebber mr.dr. G.A.E. Thodé
· Registro Sivil, Asuntunan di Elekshon;
· Servisio Sentral di Vigilansia (SSV);
· Komishon pa Kombatí Kalamidat.

Diputado sra. drs. Marugia S.M. Janga
· Struktura Estatal;
· Salubridat Públiko i Higiena;
· Asuntunan Sosial i Bienestar;
· Asuntunan General i Hurídiko;
· Servisio di Informashon i Protokòl.

Diputado sr. Pancrasio B. Cicilia
· Finansas, bou di kua Fundashon Wega di Number Boneiru (F.W.N.B.)
· Asuntunan di personal;
· Asuntunan Ekonómiko i Laboral, bou di kua turismo;
· Empresanan di gobièrnu (ku eksepshon di Telbo, BIA en Selibon) 

Diputado sr. Frensel J. Janga
· Servisio di DROB Ruimtelijke ontwikkeling en Beheer, w.o. Openbare Werken;
· Agrikultura, Krio di Bestia i Peska;
· Brandwer;
· Asuntunan Interno;
· Pòst i Archivo;
· Bibienda Popular bou di kua Fundashon Cas Boneriano (FCB).
 
Diputado sr. Reynolds A. Oleana
· Enseñansa, Deporte i Kultura;
· Domeinbeheer;
· Medio Ambiente i Naturalesa bou di kua Selibon N.V.
· Transporte Públiko bou di kua Aeropuerto, haf i Telbo N.V.

 

Aliansa Demokratiko Boneriano i Anthony Nicolaas a firma akuerdo di Pasanggrahan.
Djabièrnè anochi banda di 7.30 e lider di Aliansa Demokratiko Boneriano Jopie Abraham i e independiente miembro di Konseho Insular Anthony Nicolaas firma un akuerdo pa formashon di un gobièrno nobo pa teritorio insular di Boneiru den sala di konseho insular ku ta ser yama "Akuerdo di Pasanggrahan". E kuater kandidatonan pa diputado ta Frensel Janga, Nolly Oleana, Marugia Janga i Pancho Cicilia.

 

Ordenansa sentral pa trahado temporal.
Diputado Jeffrey Levenstone kier pone na altura di pueblo ku e ordenansa ku ta regulá posishon hurídiko di trahadónan, ku ta traha via di un ofisina pa kolokashon temporal, a drenta na vigor pa Boneiru.
Despues di basta esfuerso porfin gobièrnu di Boneiru por anunsiá ku e asina yamá ‘Landsverordening ter beschikking stellen arbeidskrachten’ (Ordenansa Sentral pa pone trahadó na disposishon di un otro doño di trabou) ta konta pa Boneiru tambe. E ordenansa aki tin komo meta pa regulá merkado laboral pa un i tur ku ta traha via di un ofisina di kolokashon temporal (‘uitzendbureau’) òf ku den futuro lo bai traha via di un ofisina di kolokashon temporal.
Diputado Levenstone ta sigui bisa ku e esfuerso hasí pa yega na e regulashon aki ta basá riba e vishon di gobièrnu pa yega mas pronto posibel na regulashon total di nos merkado laboral na benefisio di e pueblo en general i e trahadó en partikular.

 

Ekonomia di Bonaire ta kresiendo, aunke mas leve ku añanan anterior.
E servisio di DEZA a duna informashon tokante e desaroyo ekonomiko di Boneiru durante 2008. E kantidat di turista den 2008 a subi ku 1% kompara ku 2007. E GDP (Gross Domestic Product) real a subi ku 2.9%. Poblashon di Boneiru a subi ku 5%. Inflashon promedio pa 2008 tabata 6.2%, kual tabata un di e puntonan negativo na 2008. Mas aleu desempleo den 2008 tabata 6.3%, kompara ku 7.8% na 2006. Tantu e saldo di fiansa komo e saldo di spar di habitantenan na bankonan di Boneiru a subi, esaki ku 22% i 5% respektivamente.

Konklushon basá riba e sifranan ariba menshoná
E ekonomia di Bonaire te ainda ta kresiendo, aunke mas leve ku añanan anterior. Puntonan di atenshon òf risikofaktornan ta e inflashon haltu i e posibel kaida den kantidat di turistanan di estadia.
Kon pa kontrarestá e risikofaktornan aki?
Banda di e maneho alerta aktual di por ehèmpel TCB, ta importante tambe pa komersiantenan, konsumidónan i trahadónan aktua di un manera responsabel i konsiente.
II. Pa tèrmino mas largu diversifikashon, inovashon i kompetensia sano ta instrumentonan importante pa tene nos ekonomia vital i stabil.

Indikashonnan internashonal pa ku ekonomia di Boneiru na 2009

Por konsiderá dos desaroyo internashonal na e momentu aki.

I. Preis di zeta krudo ta subiendo pokopoko atrobe. Awor aki e ta e nivel di $ 69 pa barí, loke ta hopi mas haltu ku algun siman òf luna pasá pero te ainda ta mas abou ku e nivel promedio di 2008 ku tabata $ 99 pa barí.

E faktornan prinsipal ku ta kousa e subida di preis di krudo atrobe ta e dòler suak i e espektativanan positivo pa ku solushon di e krísis ekonómiko mundial. E dòler suak tin komo konsekuensha ku kumprando zeta krudo, ku ta di preis na dòler, paisnan ta paga relativamente ménos den nan mes moneda. Esaki ta stimulá e demanda pa zeta krudo. Alabes e espektativanan positivo ta pone ku invershonistanan i konsumidónan ta hañando mas konfiansa den e ekonomia, dor di kual nan ta kuminsá invertí i konsumí atrobe, asina stimulando e demanda pa zeta krudo. Mas haltu e demanda ta, mas haltu e nivel di preis lo ta.
Pa Boneiru e subida struktural di preis di zeta krudo internashonalmente por nifiká ku preis di koriente i gasolin lo subi, despues ku nan a wòrdu redusí algun luna pasá. Pa loke ta preis di koriente, por konstatá kaba un subida di e asin yamá brandstofclausule resientemente.

II. Internashonalmente nos ta mira ku ekonomia a kremp durante e promé kuartal di e aña aki, pues e GDP ta negativo: na Hulanda, Estados Unidos (Merka), Canada etc. Pues resultadonan di e medidanan ku a wòrdu tuma pa solushoná e krísis ekonómiko no ta visibel ainda. Internashonalmente e espektativanan ta positivo si, pues ku na fin di e aña aki e ekonomia lo kuminsá mustra un stabilisashon òf asta un kresementu leve ku lo sigui mehorá den e añanan benidero. Pues internashonalmente e konfiansa t’ey ku e medidanan tumá lo solushoná e krísis ekonómiko dentro di un tèrmino rasonabel.

Pa Boneiru esaki ta nifiká ku e aña aki mester hasi esfuersonan èkstra pa mantené e desaroyo ekonómiko. Pues spesífikamente pa mantené:
> un GDP positivo,
> e kantidat di turista di estadia na por lo ménos mes un nivel di 2008 i
> un inflashon bou di 2%.
Pa ta efektivo, pues eksitoso e esfuersonan èkstra aki mester bini di tur partisipantenan na e ekonomia di Bonaire. Pues 1] e invershonista komersial, sea chikí, mediano òf grandi (ofresé bon kalidat di produkto i servisio na preis rasonabel), 2] e konsumidó (konsumí konsiente), 3] e trahadó (traha efisiente, efektivo i ku plaser) i 4] gobièrnu (vishon, maneho i invershon públiko pa tèrmino kòrtiku, mediano i largu).

 

Ponementu di reflektor na kabel voltahe haltu.
Diputado enkargá ku medio ambiente, Elvis Tjin Asjoe, den presensia di Ibi de Palm, direktor general di WEB, i tambe Elsmarie Beukenboom, direktor di Stinapa, a kologá simbólikamente algun reflektor na e kabelnan di koriente di vòltahe haltu. Hasiendo esaki nan ta hasi e kabelnan aki mas visibel pa paranan, ya esakinan no ta bula dal den nan. Esaki ta un akshon ku ta kuadra ku e reglanan deliñá den e Plan di Maneho di Naturalesa di gobièrnu.

E ponementu di e reflektornan ta tuma lugá den kuadro di e Dia Mundial di Para Migratorio, ku ta un dia internashonal pa paranan migratorio, ku ta keda selebrá mundialmente riba dianan 9 i 10 di mei.
Paranan migratorio tur aña di nobo ta bula distanshanan masha grandi i últimamente ta haña nan mes mas tantu konfrontá ku opstákulo ku ta resultá fatal pa nan, manera turbinanan di bientu, master di transmishon i kabel di vòltahe haltu. Boneiru tambe ta un isla ku ta haña bishita di e paranan migratorio. E para migratorio mas konosí riba e isla di Boneiru ta e flamingo. E Flamingonan di Boneiru ta bula regular entre e isla i Venezuela. Riba Boneiru tambe nan ta haña nan mes mas i mas konfrontá ku kabelnan di koriente, turbinanan di bientu, master di transmishon / zènder di radio i di kompanianan di telefon. Desena di nan ta kai víktima di e opstákulonan aki den nan kaminda.
Riba nivel mundial un kantidat di miónes di para ta haña nan morto dor di bula den e tipo di opstákulonan aki. Riba insistensha di gobièrnu i Stinapa, WEB a buska e reflektornan pa kologá den e kabelnan di vòltahe haltu, pa asina hasi nan mas visibel pa e paranan. Riba Kaya Ir. R. Statius van Eps, e kaminda entre Belnem i Sorobon, tin sierto parti ku tin e reflektornan aki pone kaba na e kabelnan. Awor ta bai sòru pa pone mas di e nan na mas kabel di vòltahe haltu.
Esaki ta un akshon planeá den e Plan di Maneho di Naturalesa di Boneiru. Gobièrnu di Boneiru ta bai protehá flamingonan tambe a base di un Ordenansa Insular di Maneho di Naturalesa ku a drenta na vigor aña pasá. Protekshon di flamingo ta kai tambe bou di e reglanan di Konvenshon di ‘Bonn’, e protokòl di ‘SPAW’ i e tratado di CITES, ku a keda firmá dor di Antia. E tratadonan aki ta konta pues pa Boneiru tambe. E Konvenshon di ‘Bonn’ ta un tratado ku ta protehá bestianan migratorio. E Protokòl ‘SPAW’ ta un tratado pa áreanan protehá, tambe mata i bestianan den naturalesa den área di Caribe. E Tratado di CITES ta dirigí su mes riba kombatimentu di negoshamentu internashonal di sorto di mata i bestianan menasá.
Segun Beukenboom, e reflektor lo yuda, pero e no ta e solushon pa e problema ku e wayanan di koriente.

 

Ultimatum di UPB na Anthony Nicolaas a vense.
Durante di e konferensha di prensa di Union Patriotiko Boneriano e lider politiko Ramonsito a duna Anthony Nicolaas te awe merdia 12'or pa entrega su asiento den Konseho Insular i Staten bek na partido i si esaki no tuma luga lo kuminsa akshona.
Entre tantu e ultimatum a pasa i di parti di Nicolaas e no a entrega e asientonan. Pa loke ta e akshon ku Booi a papia di dje, a kuminsa ku spotnan ku ta kontene partinan di e reunion publiko di 18 di ougustus 2008, kaminda ku Aliansa Demokratiko Boneriano a presenta un moshon kontra Anthony Nicolaas despues ku ela haña un kondena di wes pa maltrato di su señora.

 

Trabounan di konstrukshon di rotonde a kuminsa.
Djaluna mainta a inisiá ku konstrukshon di e promé rotònde na altura di krusada Kaya Industria i Kaya Internashonal. Tabata diputadonan Kroon, Levenstone i Tjin A Sjoe ku a presensia inisio di e proyekto aki. E proyekto lo bai tin un durashon di 3 luna i Boneriaanse Wegenbouw Maatschappij (BWM) ta esun ku ta enkargá ku trabounan di konstrukshon e rotònde aki. Ta pidi usuarionan komprenshon pa inkumbinensia ku esaki ta trese kuné i pa sigui estriktamente instrukshon di kambionan den direkshon.
Banda di e konstrukshon di e rotòndenan aktualmente Gobièrnu ta trahando riba diferente otro proyektonan. Manera entre otro e krusada Kaya Piet Silie. DECO ta e kompania ku ta enkargá ku e renobashon di e krusada aki. Tambe ta trahando riba e parti di seramentu di burakunan den e diferente kayanan den mal estado.
Aktualmente tambe ta den preparashon dos otro proyekto. Unu ta renobashon di e labadó ku ta kore patras di e ofisina prinsipal di WEB NV i ku ta pasa na altura di Kaya Grandi i bai sali na Kas di Arte, i e otro ta e labadó na Kaya Avelino Cecilia.

 

Resultado na Antianan Hulandes di Elekshon pa Parlamento Europeo.
E dos urnanan elektoral di Representashon di Hulanda na Antianan Hulandes na respektivamente Willemstad i Philipsburg a risibí último dianan 1721 ènvelòp di devolushon ku papel di vota. Di nan 1500 voto tabata válido. A repartí e votonan válido entre e diferente listanan di e siguiente forma:

Lista Agrupashon/Partido Polítiko Kantidat di voto
1 CDA- Europese Volkspartij 624
2 PvdA – Europese Sociaaldemocraten 28
3 VVD – Europese Liberaal democraten 71
4 GROENLINKS 650
5 SP (Socialistische Partij) 7
6 ChristenUnie-SGP 11
7 Democraten 66 (D66) 62
8 Newropeans 1
9 Europa Voordelig & Duurzaam 0
10 Solidara 0
11 Partij voor de Dieren 12
12 EUROPESE KLOKKENLUIDERS
PARTIJ (EKP) 4
13 De Groenen 0
14 PVV (Partij voor de Vrijheid) 25
15 Liberaal Democratische Partij 0
16 Partij voor Europese Politiek (PEP) 1
17 Libertas 4

E kantidat di voto preferensial ku Mito Croes (CDA) i Nadya van Putten (GroenLinks) a haña ta respektivamente 582 i 633.

 

Anthony Nicolaas independiente den Staten.
Anthony Nicolaas, despues di a deklara su mes independiente den Konseho Insular djabierne ultimo, a bira independiente den Staten tambe. Segun Nicolaas komo independiente den Staten e lo sigui sostene e koalishon aktual.
Manera ya ta konosi, Anthony Nicolaas ku tabata forma parti di e frakshon di UPB den konseho insular a bandona e frakshon ei pa motibu ku e no tabata di akuerdo ku e forma kon e asuntunan di struktura estatal tabata bayendo.

 

Polisnan nobo a risibi diploma.
Na warda di polis a tuma lugá entrega di diploma na kuater polis nobo i un ámtenar di imigrashon.
Promé ku entrega di diploma a tuma lugá, hefe di Kuerpo Polisial di Boneiru John Schagen a dirigí palabra na e koleganan nobo.

John Schagen a yama nan bon bini den e Kuerpo Polisial di Boneiru i a desea nan hopi éksito den nan karera nobo. Tambe Schagen a mustra riba e echo ku e agentenan nobo ta yuda baha e skarsedat di polis kutin den e kuerpo.

Sandy Lint, hefe di sekshon inisial di LPO (Landelijke Politie Opleiding) durante e okashon aki a duna un bista di e preparashon ku e agentenan nobo a risibi na LPO.

 

 

Definitivamente lo konstrui dos rotonde.
Gobièrnu di Boneiru lo inisiá e aña aki ku proyekto di konstruí rotònde. E proyekto aki ta parti di e asina yamá ‘Inisiativa Sosio Ekonómiko (SEI)’ i un parti di e proyekto lo wòrdu finansiá tambe ku fondonan Hulandes pa Desaroyo. E proyekto aki lo wòrdu kordiná dor di USONA.
Ta trata aki di konstrukshon di dos rotònde, unu riba e krusada Kaya Industria – Kaya Internashonal i unu na Kaya Industria – Kaya Nikiboko Sùit. E dos krusadanan aki ta wòrdu konsidera komo dos “black spòt”, puntonan kaminda remarkabelmente hopi aksidente ta tuma lugá.
Ku konstrukshon di e rotòndenan aki aparte di siguridat den tráfiko, fluho di tráfiko tambe lo mehorá. Riba e rotòndenan aki lo apliká e reglanan internashonal di tráfiko ku ta enserá ku e tráfiko riba e rotònde tin preferensha. Esaki lo wòrdu indiká ku bòrchi i tambe lo wòrdu marká riba kaminda.
Djaluna 8 di yüni 2009 lo inisiá ku konstrukshon di e rotònde riba kaya Industria – Kaya Internashonal. Ta spera ku e trabounan lo dura mas òf ménos tres luna. Lo kuminsá ku konstrukshon di e otro rotònde na krusada Kaya Industria – Kaya Nikiboko Sùit despues di e periodo di áwaseru, pues na final di yanüari 2010.
Durante e periodo di ehekushon direkshon di tráfiko lo wòrdu kambia. Durante e konstrukshon di e promé rotònde e direkshon di tráfiko lo desviá via Abraham Bulevar, Kaya Internashonal, Kaya M. Rosario, Kaya Mgr. Nieuwindt i Kaya Nikiboko Sùit. Na e rotònde na Kaya Industria – Kaya Internashonal lo konstruí tambe dos labadó nobo. E rotònde lo bini ku un strok traha di klenku den e sirkulo mei mei di e rotònde ku ta destiná pa outo por kore riba dje. E strok aki por wòrdu usá pa vehíkulonan hanchu ku no tin sufisiente espasio pa kore. Un banda di e rotònde lo konstruí un alsera di klenku speshalmente pa peatonnan. E otro banda e kantu di kaminda lo basha asfalt .
E kontratista ku lo ta enkargá ku e trabounan ta Bonairiaanse Wegenbouw Maatschappij (BWM), miéntras ku kordinashon i inspekshon di e trabounan lo wòrdu hasi dor di Dienst Ruimtelijke Ontwikkeling en Beheer e sekshon di trabounan sivil.

 

Djadumingu a selebra 40 aña Washington-Slagbaai.
Djadumingu dia 31 di mei STINAPA a konmemorá huntu ku Marshe di Rincon i pueblo di Boneiru na entrada di Washington Park e echo ku 40 aña pasá plantashi Washington a bira área protehá. Mas ku mil hende a drenta parke e dia ei. For di mainta tempran a kuminsá ku kareda na pia i kaminata, desayuno, kuminda krioyo i barbekiú na entrada di e parke. Pueblo i bishitantenan di Boneiru a kana den parke, subi Brandaris, kore baiskel, i a landa na Slagbaai.
Tabatin tremendo show kultural, músika i bailamentu na entrada di nos Parke Nashonal Washington Slagbaai. Musika tabata na enkargo di grupo ESO i Tuti Fruti. E hobennan di grupo di baile Rikesa di Rincon tambe a duna un bunita show pa asina entretené e públiko.
Manera ya a menshona, mas ku mil persona a forma parti di e selebrashon di e 40 aña di eksistensia di e prome Parke Nashonal di Boneiru i Antia. En total 130 outo a drenta pa kore rònt den parke.
Por lesa mas i wak foto di e selebrashon den e siguiente edishon di “MAKUBEKEN”, e korant grátis di STINAPA i su spònsernan di e kampaña di komunikashon yama “NOS TA BIBA DI NATURALESA”. E korant ta yen di informashon tokante naturalesa i medio ambiente di Boneiru. E lo sali fin di yüni, i henter pueblo di Boneiru ta hañ’é grátis den su brivenbùs òf pòstbùs. Pa haña mas informashon por bishita e wèbsait di STINAPA www.stinapa.org.

 

Anthony Nicolaas a deklara su mes independiente den Konseho Insular.
Anthony Nicolaas a deklara su mes independiente den Konseho Insular awe mainta i a yuda forma kuorum pa reunion publiko. Durante e reunion ei Nicolaas huntu ku e kuater miembronan di e frakshon di Aliansa Demokratiko Boneriano unanimamente (ya ku e frakshon di UPB no tabata presente) a asepta moshon di deskonfiansa kontra gobiernu i diputadonan.

Segun Anthony Nicolaas (foto) e motibu pa su desishon ta ku e no ta di akuerdo ku e forma kon e tramitenan pa e kambio di struktura estatal ta bayendo.
E lider politiko di UPB, Ramonsito Booi, a bisa ku su partido no ta asepta loke a pasa i ta bai pone preshon riba Nicolaas pa entrega asientonan di Konseho Insular i Staten bek na partido.
Pa loke ta e lider di frakshon di Aliansa, Jopie Abraham, e ta felisita Boneiru pa a skapa di gobiernu di UPB i tambe felisita Anthony Nicolaas pa e desishon tuma.

 

Polis a detene dos persona enkonekshon ku atrako.
Enkonekshon ku e atrako ku a tuma lugá den e mardugá di prome di desèmber pa 2 di desèmber 2008 riba empleadonan di un establesementu na Kaya Teresa Ilario kaminda dos empleado a keda gravemente herida e departamentu di reshèrshi a tene dos entrada hudisial en buska di dos sospechoso. E entradanan aki a tuma lugá djarason den oranan di mainta. E promé tabata den un kas den Kaya Paloma, kaminda e departamentu no a haña e sospechosonan ku nan tabata buska. E departamentu a konfiská si algun artíkulo durante e entrada aki.
E di dos entrada tabata den un kas den Kaya Opal. Akinan tampoko e departamentu no a haña e sospechosonan ku nan tabata buska. Den e kas aki tambe e departamentu a konfiská algun artíkulo.
Alrededor di 08.55 un di e sospechosonan ku e departamentu tabata en buska di dje a bin entrega su mes na warda di polis Kralendijk. Mesora a detené e hòmber aki di inisial F.R.T. di 23 aña pa e atrako menshoná.
Kontinuando ku e investigashon e departamentu a logra detené e otro sospechoso alrededor di 10.15 riba Bulevar Gobernador N. Debrot pa e atrako menshoná . E sospechoso ku e departamentu a detené ta un hòmber di inisial J.T.I. di 21 aña. A enkarselá ámbos sospechoso pa mas investigashon

 

Gobiernu ta purbando pa laga barkunan di Pullmantur bin Boneiru tog.
Despues di a anunsia ku barkunan krusero di Pullmantur lo a bishita Boneiru durante e perido di yuni pa oktober, a resulta ku e kompania aki, ku tin komo 'home port' Aruba, a kambia di idea i ku lo konsentra riba e area ost di karibe.
Diputado di turismo, Jeffrey Levenstone, a deklara ku diparti di Boneiru ta purbando pa kambia e desishon aki pa asina tog e barkonan di Pullmantur bishita Boneiru. Click aki pa skucha e deklarashon di diputado Levenstone.