click

PLAY 

OLB i OCW ta konmemorá abolishon di sklabitut ku pelíkula nobo

Dia 1 di yüli nos ta para ketu na abolishon di sklabitut na Boneiru. Pa e okashon aki e aña aki a produsí un ‘short-movie’ riba enkargo di Entidat Públiko Boneiru i Ministerio di Enseñansa, Kultura i Siensia. Den e pelíkula aki nan ta para ketu na e historia i ta tira un bista positivo riba e konsekuensianan di e momentu históriko aki. Durante un enkuentro riba e mesun dia aki lo presentá e pelíkula na Mangazina di Rei.


Entidat Públiko Boneiru i Ministerio di Enseñansa, Kultura i Siensia a disidí huntu pa e aña aki konmemorá abolishon di sklabitut na Boneiru i sòru pa esaki haña mas aseptashon serka nos pueblo pa medio di un pelíkula kòrtiku. Den e asina yamá ‘short movie’ aki nan ta para ketu na e momentu importante aki den historia i ta ilustrá e konsekuensianan na un manera positivo. Riba e dia mes lo por mira e pelíkula durante un enkuentro na Mangazina di Rei, kaminda lo por habri un diálogo tambe tokante e tópiko aki. Diputado Nina den Heyer ta indiká ku e página pretu aki den nos historia meresé nos atenshon. Den un diálogo tokante esaki nos por reflektá i wak bèk, pero na promé lugá nos por traha pa bai dilanti. Ku orguyo, ku kabes na haltu i ku balor propio. Por lo tantu e ta un dia ku nos ta konmemorá huntu.


Riba 1 di yüli 1863 e hendenan ku nan a hasi katibu, a haña nan libertat ofisial. Esaki ta hasi e fecha aki unu históriko ku a trese un fin na un periodo tristu den historia di Boneiru i otro partinan den Karibe, manera e anterior Antia Hulandes i Sürnam. Riba e dia aki a otorgá libertat na mas òf ménos 750 hende ku nan a hasi katibu. Despues di e fecha aki nan a sigui traha si pa e gobièrnu di e tempu ei.

Ta trata di un tema delikado, ku nos no ta papia hopi biaha tokante di dje. Mayoriá biaha nan ta menshoná ku un hende ta di desendensia indjan, pero tiki biaha nan ta ekspresá ku orguyo ku un persona a nase di hendenan ku nan a hasi katibu. Ku esaki nan ke mèn desendiente di hendenan ku nan a hasi katibu i desendiente di doñonan di katibu. E hende ku ta biba na aña 2020 no tin kulpa na loke a pasa.


Historia di sklabitut ta un parti di nos patrimonio kultural. Pa e motibu aki ta importante ku nos tin konosementu di esaki i ku nos ta habri nos mes pa sinti i komprendé kiko a pasa. Kultura ta forma un parti di Boneiru su identidat. P’esei ta importante ku nos por konosé i komprendé nos propio kultura. Pa hendenan ku bin biba na Boneiru tambe ta di importansia pa nan siña e historia aki, pasobra di e manera aki nan por mustra mas komprenshon pa nan ko-suidadanonan. 

Diputado Nina den Heyer ta enfatisá ku mester rekonosé ku sklabitut tabata forma parti di Boneiru i ku awendia tur hende tin e eskoho pa eksperensiá libertat. Liber di opreshon, liber di pensamentunan negativo, liber di un komportashon sin base. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com