click

PLAY 

Patruyanan intensivo lo kontinua rondo di islanan ABC

Wardakosta huntu ku Defensa lo kontinuá ku patruyanan intensivo rondo di e islanan di Aruba, Boneiru i Kòrsou. E patruyanan amplio akí ta prinsipalmente pa evita yegada di lanchanan ku personanan indokumenta na bordo ku por ta infektá ku e vírùs di COVID-19. Na momentu ku e personanan akí yega e islanan sin ser kontrolá nan por forma un peliger pa habitantenan. 

Ta konosí ku e lanchanan ku ta uza pa e biahenan mayoria biaha no ta ekipá pa hasi e tipo di biahenan akí i ta hiba demasiado persona na bordo di un forma iresponsabel. E biahe for di Venezuela pa e islanan ABC ta unu peligroso pa motibu ku e laman por ta brutu. Tur e faktornan menshoná ta forma un riesgo enorme pa esnan na bordo. Den pasando, pero tambe resientemente famianan a pèrdè nan sernan keri den aksidente ku lancha. Wardakosta ta alertá personanan pa no kuminsa na e biahe peligroso akí. 

E sistema di radar huntu ku unidatnan aéreo i di nabegashon di Wardakosta i Defensa lo siguí patruyá pa asina tin grip riba e fronteranan marítimo. Tur e patruyanan di Metal Sharks lo risibí sosten di milisianan di Karibe pa asina efektuá vigilansha 24 ora pa dia durante 7 dia pa siman. Alabes e patruyanan ta vigilá i protehá e fronteranan di transportenan di droga, trafikashon di hende i di arma. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com