click

PLAY 

PCN ta kumpra Breadline Plaza na Saba

Fondo di Penshun Hulanda Karibense (PCN) a kumpra e kompleho ‘Breadline Plaza’ na Windwardside, na Saba. Ku e kompra akí e promé invershon di PCN na Saba ta un echo. 

Breadline Plaza ta un un kompleho úniko i gustá serka tantu bisiña- komo hürdónan. E kompleho ta keda na e parti ost di Saba, den kurason di Windwardside i tin un balor sosial importante. Breadline Plaza ta enserá banda di kuater unidat residensial, entre otro un panaderia, un óptika, un restorant, un konsultorio dental i un ofisina di pòst/kurir. 

PCN a traha e último lunanan aktivo pa sigui ekspandé su invershonnan lokal riba e islanan Boneiru, St. Eustatius i Saba (BES). E invershonnan ta tuma lugá pa medio di un vehíkulo ku a lanta spesialmente pa e meta akí, e asina yamá Participatiemaatschappij Caribisch Nederland (PMCN); un kompania 100% di PCN. E kompra ta kuadra ku e maneho di invershon lokal, manera e Fondo a stipulá algun tempu pasá. Harald Linkels, presidente di direktiva di PCN, ta kontentu ku e kompra. “Saba tabata haltu riba e lista di deseo di PCN. Kompra di Breadline Plaza ta pas den e plannan di PCN pa invertí riba tur isla di BES den diferente sektor”.

Walter Blijleven, direktor di PMCN, a hasi gran mayoria di e preparashonnan i a hiba e negosiashonnan ku famia Peterson, anterior doño. “Danki Dios nos por a kuminsá un gran parti di e preparashonnan i finalisá esakinan promé ku e problemanan di corona. E forma agradabel i habrí di koperashon ku famia Peterson sigur a aportá positivamente den esaki. Finalisashon di e kompra no ta solamente importante for di perspektiva ekonómiko, pero e ta duna un señal di konfiansa esensial pa futuro, i tambe di e kompromiso di PCN ku e tres islanan BES”.

Stanley Peterson ta añadí: “Nos ta sumamente kontentu ku e koperashon ku PCN i ta agradesido pa e konfiansa ku ta pone den e kompleho, den nos i sigur den Saba. E traspaso ta garantisá konservashon di e funshon sentral isosial di Breadline Plaza. Nos tur huntu ta karga e speransa, ku ora e espasio aéreo bolbe habri, mesora kos lo drecha pa Saba.” Peterson ademas ta keda liá na Breadline Plaza komo manager.

Kompra di Breadline Plaza ta e promé invershon konkreto na Saba, pero segun presidente di e direktiva, Harald Linkels, sigur no e último. "Nos ta studiando diferente proyekto interesante na Saba; sinembargo e desaroyonan resien di corona naturalmente ta obligá nos pa aktua ku koutela pa yega na desishonnan bon pensá", segun Linkels.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com