click

PLAY 

Polis a los tiru di atvertensia na diferente okashon

Kuerpo polisial ta bisa di a tuma nota di oumento di violensia i e molèster ku e ta forma den sentro di siudat i p’esei lo ta visiblemente presente den e area ei. No ta tolerá violensia i insulto kontra polis i lo aktua kontra esaki. Polis tin un tarea pa mantené òrdu i ta importante pa laga polis ehersé su trabou den situashonnan difísil.
Esaki ta bini despues ku den fin di siman tabatin diferente kaso di violensia, kaso kaminda ku no a sigui òrdu di polis i ku mester a los tiru di atvertensia.

Den mardugá di djabièrnè 29 di mei pa djasabra 30 mei, un peaton ku tabata krusa kaya a insultá agentenan polisial den funshon durante di un patruya. Despues ku a atendé ku e peaton tokante esaki, un otro persona a bin aserka i a kuminsá mete ku e situashon i kuminsá insultá polis. E no a duna oido na òrdu di polis i e agentenan a bai over na detenshon di e hòmber di inisial E.N.A.T di 31 aña di edat, pa kua e sospechoso a duna resistensia. Seguidamente un kantidat grandi di mirónes a kuminsá atendé ku e situashon i ekspresá menasa dor di kua un di e agentenan polisial a hañ’e ta lòs dos tiru di atvertensia den haltu. E públiko no a duna niun reakshon riba esaki dor di kua un otro agente tambe a hañ’e ta lòs tiru di atvertensia.


Den oranan trempan di mardugá di djasabra 30 pa djadumingu 31 di mei, a konfiská un bròmer na momentu ku e shofùr a pone ‘fever’ na un manera demonstrativo dilanti di agentenan polisial ku tabata presente. Algun ratu despues un otro persona tambe a buta ‘fever’ i a kore bai. Un otro patruya a mira e bròmer i por a nota ku e shofùr a subi velosidat despues di kua ela pèrdè kontrol den un bògt riba Kaya Internashonal. Ambulans a transport’e pa hòspital pa tratamentu médiko. E shofùr a haña un prosès ferbal pa kore sin reibeweis i tambe komo ku e no a kumpli ku e lei di identifikashon. A konfiská e bròmer.


Alrededor di 3or di mardugá a patruyá di forma preventivo den ‘Centrumgebied’. Shofùr di un outo  a kuminsá buta ‘fever’ na un manera demonstrativo den presensia di polis i e públiko presente i despues a kore bai. A kuminsá ku un pèrsekushon ku a terminá den Nort di Saliña. A detené shofùr di e outo, un hòmber di inisial Y.J.C. di 28 aña, en konekshon ku ela trese tráfiko den peliger i pa resistensia durante di su detenshon. A detené e otro okupante di e outo, un hòmber di inisial J.M.M.B. di 26 aña en konekshon ku e no a kumpli ku e lei di identifikashon. A konfiská e outo.


Un ratu despues a drenta notifikashon di un kaso di bringamentu den ‘Centrumgebied’. Di e dos personanan ku tabatin pleitu ku otro, un tabatin un bòter i e otro un machete. Nan tabata rondoná pa un públiko grandi presente. Despues di no a duna oido na òrdunan di polis pa stòp, un agente polisial a hañ’e ta lòs tiru di atvertensia pa al final kita esnan bringando for di otro. A detené un hòmber di inisial E.d.l.C. di 28 aña di edat en konekshon ku violashon di e lei di Arma BES. A detené un dama tambe di inisial D.D. di 22 aña di edat en konekshon ku perturbashon di órden públiko. No por a detené e persona ku tabatin e machete na e momentu ei. Investigashon ta andando.


Djaluna promé di yüni, alrededor di 1.50 di marduga, a los kuater tiru for di un outo den sentro di siudat. Despues di investigashon a detené un hòmber di inisial W.M.A.A. di 28 aña di edat na un kas situá na Kaya Kalipso, en konekshon ku violashon di e Lei di Arma BES. A tene un entrada hudisial tambe na e adrès aki, kaminda a konfiská munishon i un kantidat chikitu di supstansia narkótiko.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com