click

PLAY 

Pronóstiko ta mustra ku temporada di orkan lo ta mas aktivo ku normal

E temporada di orkan 2020 pa e area atlántiko ta kuminsá awe. National Oceanic and Atmospheric Administration, NOAA, su sentro di pronóstiko di klima ta spera un temporada di orkan ku ta mas aktivo ku nòrmal. Ta pronostiká ku e chèns ku e temporada aki ta mas aktivo ku normal ta 60%, 30% ku e temporada ta serka di normal i e chèns ta solamente 10% ku e temporada di orkan lo ta menos aktivo ku normal. E temporada di orkan ta terminá riba 30 di novèmber.


NOAA ta pronostiká entre 13 pa 19 tormenta ku lo haña nòmber, di kua 6 te 10 por bira orkan, inkluyendo 3 te 6 orkan grandi di kategoria 3, 4 of 5. NOAA ta duna kantidatnan aki ku un konfiansa di 70%. Komo averahe un temporada di orkan ta produsí 12 tormenta ku ta haña nòmber, di kua 6 ta bira orkan, inkluyendo 3 orkan grandi.


E kombinashon di diferente faktor di klima ta kousa e chèns grandi aki di un temporada mas aktivo ku normal e aña aki. Ta verwacht ku kondishonnan di El Niño lo keda neutral of lo bai den direkshon di La Niña, loke ta nifiká ku lo no tin El Niño pa stroba aktividat di orkan. Tambe laman mas kayente ku normal den oséano Atlantiko tropikal i Karibe, kombiná ku bientu mas suak i ku monsoon afrikano mas aktivo tur ta pone ku e chèns ta grandi ku e temporada di orkan lo ta mas aktivo ku normal. Kondishonnan similar ta produsiendo temporadanan aktivo for di komienso di e era di aktividat haltu aktual na 1995.


E nòmbernan pa e aña aki ta Arthur, Bertha, Cristobal, Dolly, Edouard, Fay, Gonzalo, Hanna, Isaias, Josephine, Kyle, Laura, Marco, Nana, Omar, Paulette, René, Sally, Teddy, Vicky i Wilfred. Miéntras tantu tormentanan tropikal Arthur i Bertha ya a forma te disparsé riba respektivamente oséan Atlantiko i parti ost di Merka.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com