click

PLAY 

Pronto lo presentá protokòlnan di salú i seguridat relashona ku turismo

E direktor di Bonhata, Veroesjka de Windt, den e mas resien update di Bonhata na su miembronan relashoná ku coronavirus a trata e echo ku dia promé di yüli Boneiru lo kuminsa risibí turista for di Hulanda, Belgika, Luxemburg, Fransia i Alemania. E ta bisa ku e sektor di turismo tabata preparando riba esaki. A implementá e regulashonnan di distanshamentu sosial i ta adaptando na e rekesitonan nobo. Ta trahando pa sòru pa e seguridat di trahadornan i tambe bishitantenan. E siguiente paso ta pa informá i prepará pueblo pa yegada di bishitantenan i e adaptashon di komportashon nesesario pa redusí e risiko i miedu di keda infektá ku corona virus. Gobiernu lokal, departamentu di salubridat, sektor di turismo i otro stakholdernan ta trahando den koperashon estrecho pa krea protokòl di salú i seguridat pa henter e isla. Pronto lo presentá e protokòlnan ofisial.


Pa awor e direktor di Bonhata ta duna un bista di e puntonan mas importante. Promé ku bishitá Boneiru, e bishitante por risibi informashon di protokòl di seguridat i prosedura online. E puntonan ku ta trata ta seguridat na aeropuerto, protokòl duidelijk pa uso di transporte sea pa medio di bùs, taxi òf auto di hür, kiko ta spera di tur esnan ku ta ofresé servisio di hospitalidat, protokòl kla pa bishitantenan ku ta sospechá di tin coronavirus, i hotline pa preguntanan relashoná ku covid-19.


Tokante e plan di merkadeo pa e rekuperashon e direktor di Bonhata ta bisa ku dos siman pasá a presentá un konsepto di e plan na un grupo di stakeholder. E plan ta basá riba e plan maestro di turismo, Boneiru komo destinashon blou i tin tres punto di enfoke; trese turistanan di merkadonan eksistente bèk na momentu ku frontera habri, desaroyo di turismo di kalidat ku enfoke riba turistanan ku lo gasta mas i ku kier risibi e eksperensia boneriano i oumentá partisipashon di komunidat den turismo dor di konektá e komunidat lokal ku e turista.


E tres puntonan aki mester yuda mitigá e efektonan di e normal nobo na un minimo pa e ekonomia, i ku mira tambe riba un transishon pa un Boneiru i un sektor turistiko mas resistente. Pa termino kòrtiku esaki ta nifiká ku lo tin hopi atenshon pa e merkadonan eksistente, mientras ku na mes momentu lo traha riba puntonan dos i tres, di manera ku por hasi e transishon di forma kordiná pa e merkado di turismo di kalidat i eksperensianan lokal.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com