click

PLAY 

Roadmap ta mustra kaminda pa un reinisio responsabel di aktividatnan ekonomiko

Na momentu ku gezaghèber Edison Rijna a presentá e dokumentu ‘Covid-19 Roadmap Boneiru’ na Kolegio Ehekutivo, e époka despues di corona a kuminsá den kua paso pa paso ta bai duna reinisio na ekonomia boneriano. Riba djabièrnè gezaghèber Rijna ofisialmente a entregá e dokumentu na diputado di Desaroyo Ekonómiko i Turismo Elvis Tjin Asjoe.


E ‘roadmap’ – ku komo suptítulo ‘E kaminda pa un apertura i reinisio responsabel di aktividatnan ekonómiko’ – ta deskribí medidanan formulá den un liña di tempu, pa minimalisá reintrodukshon di e vírùs di corona i si no opstante e medidanan aki tòg e vírùs lanta kabes atrobe, pone un paro inmediatamente na esei.


Ku tur e medidanan di prekoushon ku gobièrnu lokal a tuma pa bishitantenan (entre otro e obligashon pa promé ku salida for di nan pais pasa un tèst sertifiká i yena un deklarashon di salú amplio i alabes eksklushon di biaheronan for di paisnan ku nan a deklará insigur), ekspertonan ta konsiderá e posibilidat ku un persona infektá ta drenta Boneiru sumamente chikitu.


Kon mínimo ku e riesgo por ta, e punto di salida ta keda un protekshon maksimal di salú di nos poblashon. Pa e motibu aki sierto reglanan ta vigente pa bishitantenan, manera distansiamentu sosial i higiena i tambe tin instrukshonnan estrikto pa den kaso ku un persona tin keho di salú. Banda di esei tin vários protokòl pa empresanan i organisashonnan pa por ofresé tantu nan wéspetnan komo nan empleadonan siguridat optimal.


Reapertura di turismo lo kana den fase, kuminsando ku no mas ku 1000 wéspet pa siman. Por lo tantu lo dura algun tempu promé ku empresarionan den e sektor aki tin sufisiente entrada atrobe pa por kubri tur gastu di nan negoshi. Pa e motibu aki gabinete, entre otro den konsulta ku Diálogo Sentral, a disidí pa prolongá e pakete di emergensia en todo kaso te ku òktober.


‘Ku presentashon di e ‘roadmap’ aki e momentu a yega ku nos tabata spera pa vários luna kaba: nos por yama e turistanan for di Hulanda i otro paisnan seif bon biní atrobe. Nos hotèlnan ta haña un bida atrobe, meskos ku nos restorant- i tèrasnan i malekon. Ya kaba e promé reservashonnan a drenta serka e kompanianan di hür outo i e skolnan di buseo’, segun diputado di Desaroyo Ekonómiko i Turismo, Elvis Tjin Asjoe.


Sektor turístiko ta bon prepará, asina e diputado a enfatisá. Aunke no tabatin turista, tòg no tabatin kestion di sinta ketu durante e último lunanan. Hopi empresario a usa nan tempu pa prepará nan mes pa reapertura di nos isla. Siman pasá Departamentu di Salú a duna informashon amplio na representantenan di sektor turístiko tokante e medidanan ku nan mes por tuma pa un reinisio seif di nan aktividatnan. E Plan pa Rekuperashon di Turismo (Tourism Recoveryplan) ku a realisá ku aporte di hopi siudadano i organisashon for di nos komunidat, ta sirbi komo guia pa promové e rekuperashon ekonómiko. ‘Nos ke hasi uso di e oportunidat di reinisio pa enfoká riba turista ku ta bini Boneiru pa mas ku solamente solo i laman, pero ku tin atenshon tambe pa e partinan úniko di nos isla: espasio, trankilidat, naturalesa i kultura. Nos no ta skohe pa kantidat, pero pa kalidat. Nos ta enfrentá un desafio masivo, pero e elastisidat ku mi a señalá e último tempu den nos komunidat ta duna mi konfiansa ku huntu nos ta sali mihó for di e krísis aki’, segun diputado Tjin Asjoe. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com