click

PLAY 

Segun Michael Pieters, demokrasia den Konseho Insular na peliger!!!

Di akuerdo ku miembro di Konseho Insular pa Partido Demokrat, Michael Pieters, frakshon di Partido Demokrat ta eksperensiando algu sumamente peligroso den Konseho Insular kual ta e derecho di un representante di pueblo pa hasi pregunta riba asuntunan di gobernashon ta na peliger.

Ta asina ku siman pasá, pa ta mas eksakto djaluna dia 1 di yüni 2020, frakshon di Partido Demokrat konforme regla a hasi diferente pregunta na Kolegio Ehekutivo pa den e reunion di su siguiente dia di parti di Kolegio Ehekutivo haña kontesta riba esakinan.

Artíkulo 46 insiso 2 di nos Reglamentu di Òrdu ta duna e posibilidat pa 24 ora promé ku e reunion públiko, un miembro por hasi pregunta na Kolegio Ehekutivo.


Den e kaso aki frakshon di Partido Demokrat a entregá su preguntanan dia 1 di Jüni promé ku 6’or di atardi mirando ku e reunion públiko lo tabata su siguiente dia, esta dia 2 di Jüni pa 7’or di anochi. Pues, a entregá e preguntanan konforme regla na tempu.

Riba e dia di reunion públiko, esta dia 2 di Jüni, despues di 3’or di merdia, presidente di Konseho Insular ta konvoká di forma di urgente un reunion di presidio pa 6.30’or di anochi pa papia ku lidernan di frakshon tokante e preguntanan ku mester keda kontestá pa Kolegio Ehekutivo den e reunion di 7’or di anochi.

Akinan lider di frakshon pa Partido Demokrat, Clark Abraham, ta haña di komprondé di presidente di Konseho Insular ku Kolegio Ehekutivo lo no duna kontesta na e preguntanan hasí pa frakshon di Demokrat.


Segun Pieters, esaki ta un violashon di e derecho ku un miembro di Konseho Insular tin, esta pa hasi pregunta(nan) ku e miembro ta haña di inportansha i ku Kolegio Ehekutivo tin deber di kontestá.

Preguntanan ku frakshon di Partido Demokrat a hasi ta tópikonan ku e frakshon ta konsiderá di sumo importansia pa pueblo di Boneiru ta na altura di dje.

Presidente di Konseho Insular den reunion di presidio a duna di konosé ku e preguntanan no a keda entregá na tempu, loke ta un mentira flagrante, i ku e preguntanan hasí no ta presiso sufisiente.

Akinan nos sistema demokrátiko ta drenta na peliger, segun Pieters. Preguntanan hasí pa frakshon di Demokrat ta lo siguiente:

    •    Asuntunan di destaho di kontraktnan públiko di gobièrnu

    •    Situashon tokante kobransa di voorschot riba pago di impuesto hasí pa touboot

    •    Situashon relashoná ku asistensia riba tereno di BIA (grondafhandeling)

    •    Situashon relashoná ku hunta di BIA

    •    Preis di gasolin na Boneiru i otro derivato di petroli en relashon ku preisnan di petroli mundialmente

    •    Situashon na BOPEC i posibel konsekuensia nan sosio-ekonómiko

    •    Asuntu di enkuentro di kopa final di futbol entre FC Utrecht i Feyenoord aki na Boneiru

E preguntanan aki pa presidente di Konseho Insular i Kolegio Ehekutivo ta keda konsiderá komo preguntanan hasí ku no ta presiso sufisiente.


Ku e akto aki, definitivamente nos sistema demokátiko ta na peliger kaminda ku e representante di pueblo ta keda opstakulisá pa hasi su trabou na interes di pueblo.

I den esaki ta hopi biaha mas sistemátikamente ta purbando di stroba frakshon di Partido Demokrat di hasi su trabou den Konseho Insular kaminda den pasado a ninga di trata amiendanan presentá pa e frakshon, a ninga di yama reunion pidí pa e frakshon i usando argumentunan ku despues mester a konsedé esakinan tòg, ora ku frakshon di Demokrat mester a bai buska su derecho serka representante di Reino kende a mustra presidente di Konseho Insular ku e no por kita e derechonan ey for di un miembro di Konseho Insular.


Finalmente Michael Pieters a bisa ku frakshon di Partido Demokrat sigur lo no laga e asuntu aki asina i lo keda bringa pa su derechonan pa asina por hasi su trabou di un forma digno komo representante di pueblo na interes di e pueblo di Boneiru.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com