click

PLAY 

Selibon ta bai rekolektá zeta bieu na empresanan

Dentro di poko Selibon NV ta bai kuminsá rekolektá zeta bieu na diferente empresa, entro otro na garashinan.


Na e momentunan aki rekolekshon, almasenamentu i transporte di zeta bieu ta un punto di atenshon importante na Boneiru. For di tempu ku BOPEC NV a stòp ku prosesamentu di zeta bieu, Selibon NV, den koperashon ku Entidat Públiko Boneiru i Ministerio di Infrastruktura i Maneho di Awa ta trahando duru riba un alternativa pa rekolekshon, almasenamentu temporal i prosesamentu di esaki.


Di akuerdo ku e Ordenansa Insular Produktonan Residual konforme lei a asigná zeta bieu komo un produkto residual ku mester keda ofresé na un manera separá pa rekolekshon. Selibon NV lo rekolektá zeta bieu, almasená esaki temporalmente na sentro di shushi Lagun i transport’é pa un prosesadó ambientalmente responsabel den eksterior.


Ta importante pa kada empresa ku tin zeta bieu registrá su mes pa e rekolekshon aki. Empresanan mester registrá nan mes via e página di Facebook di Selibon NV pa bini na remarke. E empresanan lo risibí un karta di Selibon NV ku mas informashon tokante esaki.


Pa e promé ròndu di rekolekshon no tin gastu pa e empresanan, a ménos ku ya kaba tin palabrashon hasí tokante esaki. Dentro di poko Selibon lo aserká empresanan tambe pa hasi palabrashon tokante rekolekshon struktural. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com