click

PLAY 

Selibon ta kuminsa ku kampaña di limpiesa den bario

Despues ku Selibon NV a risibí diferente bon reakshon relashoná ku e trabounan di limpiesa riba kaya Korona, Selibon NV ta lansa un kampaña di limpiesa den bario. E kampaña aki ta titulá “Ta nos bario: limpi i bunita”. E meta di e kampaña aki ta pa konsientisá e habitante pa tene su bario limpi. 


Dia 25 di yüni lo kuminsá ku e kampaña aki den bario di Antriòl, pa mas eksakto Den Stashi, Den Tuna i besindario. Durante 1 luna lo limpia diferente área den Antriòl Pariba i pa despues sigui ku Antriòl Pabou. Segun ku e trabounan ta avansando, lo publiká regularmente kua kaya i òf bario ta na turno. 


Esaki ta un kampaña den koperashon ku Entidat Públiko Boneiru, Blue Destination, Fundashon Boneiru Limpi i Bunita i tambe Fundashon Avanti. 


Pa duna inisio na e proyekto aki, Selibon lo organisá un rueda di prensa djaweps 25 di yüni, 17:00 na Parke Den Stashi (Kaya Constancia). Tur miembro di prensa i habitante di bario di Antriòl, Den Stashi, Den Tuna i bisendario ta keda invitá pa ta presente na e rueda di prensa aki.


Ta hasi un yamada na tur habitante di Antriòl, Den Stashi, Den Tuna i bisendario pa kuminsá limpia den kurá òf rònt di nan kas, pasobra Selibon lo pasa den siman pa rekohé tur sushi. Chèk e página di Facebook di Selibon NV regularmente pa asina bo sa ki dia Selibon lo ta den bo bario. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com