click

PLAY 

Sita ku spesialista awor digitalmente via dòkter di kas

No ta nesesario mas pa pashèntnan bai poliklínika pa traha sita ku spesialista. Esaki ta un palabrashon entre Fundashon Mariadal i dòkternan di kas. Dòkternan di kas ta manda nan karta di referensia direktamente via email pa poliklínika. Dentro di 5 dia di trabou poli ta yama e pashènt pa stipulá fecha i ora di e sita. Esaki ta yuda pa organisá distansiamentu sosial den hòspital.

Pa referensianan di emergensia e dòkter di kas lo traha un sita direktamente via telefon ku e spesialista konserní. Pa pregunta tokante nan sita pashèntnan por tuma kontakto telefónikamente ku e poli en kestion via e number di telefon 715–8900. 

Spesialistanan médiko for di Aruba, Kòrsou òf Hulanda no por bini Boneiru tanten ku e medidanan di karentena di Entidat Públiko Boneiru ta na vigor. Asina ku e situashon aki kambia, Fundashon Mariadal ta anunsiá esaki.

Pa motibu di e menasa di COVID-19 Fundashon Mariadal a tuma medida pa evitá ku ta bira drùk ku reinan largu di hende ku ta warda den hòspital. Esaki ta pa protehá pashèntnan, su empleadonan i bishitantenan.

E empleado na bali na entrada prinsipal lo hasi kada bishitante algun pregunta pa determiná si esaki por drenta safe. Relashoná ku distansiamentu sosial a stipulá un kantidat máksimo di bishitante pa kada sala di espera di kada poli i ‘afdeling’. Ora ku alkansá e máksimo aki, for di na entrada kaba ta pidi bishitantenan pa warda pafó di e edifisio.

Den kaso ku tin hende a bin buska remedi, nan por mèldu esaki na resepshon. Eventualmente un empleado lo buska e remedinan i entregá nan na e persona en kestion.

Fundashon Mariadal ta pidi su bishitantenan i pashèntnan komprenshon pa i koperashon ku e medidanan aki. Huntu kontra corona!

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com