click

PLAY 

Siudadanonan di islanan ABC kier partisipashon di e pueblonan karibense 

den e maneho di Reino

Un grupo di siudadano di Aruba, Boneiru i Korsou a skirbi un karta habrí na minister presidente di Hulanda, Mark Rutte, den kua nan ta hasi un petishon na e mandatario hulandes. Den e karta ku ta fechá 10 di yüli e petishon di e siudadanonan ta pa gobiernu hulandes promové partisipashon efektivo di e pueblonan karibense den e maneho di Reino i hasi posibel di e forma ei pa sirbi e paisnan di bèrdat.


Pa kumpli ku e meta “estado di derecho na òrdu”, hasi uso di e kapasidat lokal i outonomia i di institutonan di estado di derecho i prinsipionan demokrátiko den Reinoi fortifiká esakinan.


Pa hustamente den e tempunan di krisis aki gobiernu di Hulanda demostra liderato moral i humanitario den Reino i skohe pa kompashon, inklushon, diálogo i solidaridat i no pa indeferensia, eksklushon, obligashon i konflikto.


Ku gobiernu hulandes ta stòp inmediatamente ku e tono denigrante i insultante tokante di nos teritorionan. Ku e ponensia ku e komunidatnan karibense inherentemente lo ta inkapas pa karga nan propio outonomia ta inkorekto i sin respet.


E petishonnan aki ta bin di e firmantenan di e karta pasobra nan a tuma nota di e diferente ponensianan di mandatarionan hulandes ku ta e minister presidente mes i tambe sekretario di estado Knops ku ta papia diun estado di derecho na òrdu.


E firmantenan ta bisa den nan karta ku e parti karibense di Reino sin mas mester buska e falta serka su mes. Nan ta rekonose ku e ordennan di derecho karibense mester di un reforma urgentemente tantu riba e tereno di estado di derecho demokratiko komo riba e tereno di finansas publiko i ekonomia. E reforma aki mester sirbi e pueblonan karibense di reino. Nan ta aseptá ku den e kuadro aki supervishon independiente ta un eksigensia. Sinembargo e kondishonnan ku e gobiernu di minister-presidente Rutte ta propone tin tiki balor agregá i ta forma un atentado kontra prinsipionan di derechonan estatal i gubernamental.


E puntonan ku e firmantenan tin problema ku ne ta e defisit di estado di derecho i demokrátiko di Reino, e falta di union den Reino i e echo ku no ta invertí den outonomia karibense.


E firmantenan ta total 50 persona di Aruba, Boneiru i Korsou. Di Boneiru e firmantenan ta Lydia Emerencia, Emmy Schermer, Edith Strauss-Marsera, Elvio Cecilia, Joan Brewster, Elsmarie Beukenboom i Alca St. Jago.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com