click

PLAY 

Skolnan a risibí laptop i supsidio di OCW

Den e siman tras di lomba mas di 1000 laptop a yega e islanan di Hulanda Karibense (Boneiru, Sint Eustatius i Saba). Kolaboradónan di OCW na Hulanda Karibense a sòru pa distribushon di e aparatonan aki bou di e skolnan ku a pidi pa nan. Ademas minister Slob a krea oportunidat pa skolnan na Hulanda Karibense por ofresé nan alumnonan aktividat èkstra pafó di e oranan di skol, pa kita retraso ku a surgi.  

Durante e siere resien di skolnan na Hulanda Karibense, komo konsekuensia di e vírùs di corona, tur skol a hasi esfuerso pa kontinuá ku enseñansa mas mihó posibel. Hopi skol a traha ku pakete di hùiswèrk riba papel pa e alumnonan, hopi biaha en kombinashon ku enseñansa via kanalnan digital. 

Mirando ku no tur famia ni maestro ta disponé di e rekursonan nesesario pa esaki – un lèptòp, tablet òf konekshon di internèt – no tur alumno por a partisipá optimalmente.

P’esei minister Arie Slob pa Enseñansa Básiko i Sekundario i Media a disidí di honra e petishon di e entidatnan públiko pa finansiamentu di laptop pa enseñansa digital riba distansia. “Ta importante pa tur alumno na Hulanda Karibense por keda risibí bon enseñansa ora ku nan ta traha hopi for di kas. E rekursonan adekuá ta krusial den esaki”, segun minister Slob.

Miéntras e provedornan di internèt riba e tres islanan tabata ofresé konekshonnan di wifi bou di tarifanan redusí òf grátis, a inventarisá pa kada isla kuantu laptop ta nesesario pa sòru pa tur maestro i alumno por partisipá na enseñansa digital riba distansia. Despues, den koperashon ku SIVON (koperashon di direktivanan di skol den enseñansa básiko i avansá) a bestèl e aparatonan i manda nan e tres islanan ku barku.


Aktualmente e skolnan ta mirando kon por integrá enseñansa digital riba distansia mihó den nan programa di edukashon. Banda di e rekursonan nesesario, ta trata aki tambe di selekshon i kompra di programanan i software i stimulashon di abilidatnan digital nesesario serka maestro, alumnonan i nan mayornan.


Banda di esaki skolnan na Hulanda Karibense por hasi uso di OCW su areglo di supsidio pa programanan pa rekuperashon i sosten enseñansa 2020-2021. Nan por usa e finansiamentu adishonal aki pa ofresé èkstra sosten den e periodo entre fakansi grandi di 2020 te ku fin di fakansi grandi di 2021 na alumnonan ku a sufri retraso den nan estudio òf desaroyo, pa kousa di e krísis di Corona.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com