click

PLAY 

SZW ta inisiá ku aplikashon pa artíkulo di skol

Mayornan di alumnonan ku (despues di fakansi grandi benidero) ta bai skol avansá, por entregá un petishon na unidat SZW di RCN pa un kompensashon den gastu di artíkulo di skol. E pakete di skol di SZW ta konsistí di bale pa entre otro ünifòrm di skol, sapatu i artíkulo pa skibi. Famianan na Boneiru ku un entrada te $1.250 nèto pa luna, ta bini na remarke pa e sosten aki. Na Sint Eustatius e límite di entrada ta $1.583 i na Saba $1.480 nèto pa luna pa kas di famia. Si tin mas yu den e kas di famia ku ta bai skol avansá, por apliká tambe si e entrada ta algu mas haltu.  

Por entregá un aplikashon na ofisina di unidat SZW òf via e-mail. Por haña e formulario di aplikashon online www.rijksdienstcn.com bou di ‘Asuntunan Sosial’. Na Saba i Sint Eustatius, mayornan i kuidadónan por akudí na SZW di djaluna te ku djaweps durante oranan di mainta, te ku promé di yüli. Na Boneiru tin orarionan di konsulta spesial den e simannan di 15 i di 22 di yüni riba djaluna, djamars i djárason entre 1:30or di mèrdia pa 3:30or di atardi. Mayornan (di kriansa) ku no ta alkansá pasa na SZW durante e orarionan aki i ku no por apliká digitalmente, por traha un sita dor di manda un e-mail pa onderstand@rijksdienstcn.com òf yama òf WhatsApp e number 781-0343.

Petishonarionan mester manda òf trese un sédula bálido, slep di salario di e último dos lunanan, estado di kuenta di banko di e último dos lunanan i un troubuk òf buki di famia. Mester entregá e dokumentonan aki tambe di pareha di e petishonario si e ta forma parti di e mesun kas di famia. Ademas mester proba ku e yu ta bai skol sekundario dor di entregá prueba di inskripshon òf e último rapòrt di skol básiko.Un vogt òf mayor di kriansa mester entregá tambe un desishon ku ta ilustrá ku e ta e kuidadó legal. Unidat SZW ta spera ku mas hende posibel ta entregá un petishon digital en konekshon ku e medidanan rondó di e vírùs di corona. Esnan ku tòg ke entregá aplikashon na ofisina di SZW, den e sala di espera ya por kuminsá yena e formulario pa asina e momentonan di kontakto kana rápido i pa no muchu hende bini huntu den e edifisio.

Mayornan di mucha ku ta bai enseñansa básiko, por tuma kontakto ku e Entidatnan Públiko pa sosten.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com