click

PLAY 

Tarifa di koriente variabel lo subi ku 0.52 sèn pa kWh

Entrante 1 di yüli 2020 e tarifanan di elektrisidat variabel di WEB Bonaire lo subi ku USD 0.0052 pa kWh. Esaki ta debí na un subida leve di preis di kombustibel, pa por produsí elektrisidat. E oumento aki ta konta pa e tarifa di uso variabel i tambe pa Pagabon. 

Ta kobra gastunan di kombustibel ku ContourGlobal Bonaire (CGB) ta hasi pa e produkshon di elektrisidat individualmente na kada kliente di WEB. WEB ta enfatisá ku no ta kalkulá ningun márgen riba e kostonan di kombustibel aki. Pa motibunan fuera di nan alkanse, CGB mester a hasi un kambio den e kombustibel ku normalmente ta usa pa por produsí elektrisidat. CGB mester a hasi uso di un kombustibel alternativo, ku ta mas karu. E efekto di esaki riba e tarifa variabel entrante 1 di yüli a keda limitá, pa motibu ku e preis di e kombustibel alternativo aki a baha debí na e krísis di vírus di korona. Konforme e Lei di Elektrisidat i Awa di bebe BES, desaroyonan di kostonan por hiba na adaptashon di tarifanan di elektrisidat variabel 2 biaha pa aña, riba 1 di yüli i 1 di yanüari. 

Autoriteit Consument en Markt (ACM) a desaroyá un modèl di adaptashon di kua e resultado ta - un oumento di USD 0.0052 pa kWh entrante 1 di yüli 2020 – a stipula e tarifa aki riba 18 di yüni 2020. Entrante 1 di yüli 2020 e siguiente tarifanan di elektrisidat variabel nobo a keda determiná : 

- Tarifa di uso variabel (post-pago) USD 0.2277 pa kWh (a inkorporá supsidio di ministerio di EZK i medidanan temporal di COVID-19 den e tarifa fiho) 

- Tarifa Pagabon (pre-pago) Tarifa di ACM (USD 0.4380) ku dedukshon di e supsidio di EZK (inkluyendo medidanan temporal di COVID-19), tarifa nobo pa paga ta: USD 0.2277 pa kWh. 

Ta apliká e tarifanan nobo di elektrisidat riba e faktura for di luna di ougùstùs 2020 (ku un fecha inisial pa e uso den yüli i un fecha final na ougùstùs). Pa usuarionan di Pagabon ta konta ku e tarifanan nobo ta visibel mesora for di 1 di yüli. NO ta adaptá e tarifa fiho. E tarifa aki lo keda kompletamente subsidiá i ta poné na sero te ku Desèmber 2020 pa motibu di e medidanan temporal di COVID-19. 

Por haña e lista kompleto di tarifa di elektrisidat ku ta válido entrante 1 di yüli 2020 riba www.webbonaire.com.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com