click

PLAY 

Te ku fin di e aña aki trahadonan di Bopec lo por sigui kobra salario

Grasias na e akshonnan kontinuo di e sindikatonan, apoyá pa entre otro outoridatnan lokal, pero tambe danki na e kompanianan RDK, CRU, CUROIL i e ofisina di notario, djabièrnè último un parti di e trahadónan di BOPEC a kobra nan salario di luna di yüli, miéntras ku den kurso di awe e sobránan lo kobra nan salario di yüli 2020. Esaki USIBO ta informa den su boletin informativo.


Ta asina ku riba un petishon di 25 di yüni di e kompanianan RDK, CRU, CUROIL i notario na OFAC pa alargá e lisensia, OFAC a bai di akuerdo pa alargá esaki te ku 31 di desèmber 2020. Esaki a trese en todo kaso trankilidat bou di e trahadónan pa loke ta pago di e salarionan te ku desèmber 2020. E alargamentu aki a bai bou di kondishonnan masha estrikto pa no violá ningun lei o sanshon di Merka kontra PDVSA. 


Ku esaki USIBO ta komprondé tambe dikon e gerente di BOPEC no por a entregá ningun dokumentu kaminda e ta firma ku nan lo a paga salario fin di luna di yüli i mas aleu. Simplemente pasobra den esaki BOPEC no ta partido. Algu ku a keda konfirmá tambe pa e sentensia di hues ku a rechasá e petishon di BOPEC pa e notario usa e fondonan riba e escrow-account.


Un biaha mas ku e alargamentu di e lisensia aki, trankilidat bou di e trahadónanta sigurá por lo pronto i pa esei USIBO ta felisitá e trahadónan pa nan union ku nan a demonstrá apesar ku nan mester a soportá basta forsanan negativo, intimidashon represaya, hasta interno ku kier a bula e UNION aki. Mester trese dilanti tambe ku e alargamentu di e lisensia a solushoná temporalmente e asuntu di pago di salario pero no a solushoná ainda e problema di e seguridat di e terminal pa e por operá según e pèrmitnan nesesario. Manera ta konosí pa òktober awor ILT a ordená pa hasi tur tanki bashí.

Den e aspekto aki e responsabilidat di inspekshon i kòntròl ta den man di gezaghebber konbiná ku e ministerio di EZK pa pèrkurá ku e terminal ta den un estado di seguridat pa tantu medio-ambiente komo pa e empleadonan ku ta laborá diariamente na e terminal. I e aspekto aki tambe USIBO i e sindikatonan lo vigilá seriamente i di aserka, ya ku seguridat ta parti integral di e kondishonnan laboral di tur trahadó di BOPEC, manera esaki ta ankrá den e CAO, artikulo 44.

Tambe ainda USIBO no a mira e solushon pa e embargonan ku tin  riba e kompania, miéntras e sankshonnan ketu bai ta na vigor. Por lo pronto USIBO huntu ku e dos sindikatonan, BPWU i Fedebon, lo sigui hasi tur esfuerso pa tene BOPEC habrí i ku mas lihé posibel e terminal por kuminsá i sigui ku su operashonnan nòrmal ku ela bin ta hasiendo ya pa 45 aña kaba na benefisio i interes di kuponan di trabou en partikular i di e ekonomia di Boneiru en general.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com