click

PLAY 

Van Ark: sigui mehora e situashon di habitantenan di Hulanda karibense

E aña ku a pasa a dal pasonan signifikativo pa mehorá e situashon pa habitantenan di Hulanda karibense. Na mes momentu e tarea pa sòru ku tur habitante di Boneiru, Saba i St. Eustatius por kubri e gastunan minimal pa biba ta keda unu grandi. Esaki ta konta spesialmente den e tempu eksepshonal aki, ku tin un impakto grandi riba e islanan dor di e pèrdida di entrada di entre otro turismo. Esei ta loke ku sekretario di estado di SZW Tamara van Ark ta skirbi den su reportahe di adelanto tokante Hulanda karibense.


Pa aksentua e esfuerso di kabinete pa Hulanda karibense, aña pasa a stipulá un ijkpunt pa e minimo sosial. Ku komo meta, hisa entradanan i baha gastunan na un nivel rasonabel.


Den kuadro di esaki entrante promé di yanuari 2020 a hisa sueldo mínimo, uitkering i kompensashon pa yu atrobe na Hulanda karibense. E kompensashon pa yu na Boneiru, St. Eustatius i Saba a bira dòbel kompará ku 2018.


Invershon èkstra den akohida di mucha entrante 2021

Entrante e aña aki kabinete ta pone strukturalmente €9.8 mion disponibel pa mehorá e kalidat i aksesibilidat finansiero di akohida di mucha. E suma aki ta subi den 2021 bai te €14 mion. Ku e medionan aki por amplia e areglo di supsidio temporal di akohida di mucha na Hulanda karibense. E intenshon di e areglo aki, ku a drenta na vigor riba promé di yüli, ta pa baha e gastunan di akohida di mucha pa mayornan i hasi posibel pa e organisashonnan di akohida di mucha pa invertí den e kalidat di e akohida. Banda di amplia e areglo di supsidio temporal, e medionan ta destiná tambe pa inisia ku estudionan, mehorá e kondishonnan laboral i pa invershon den edifisionan. Den e programa di BES(t) 4 kids lo elaborá e forma ku ta usa e medionan aki.


Segun sekretario di estado Tamara van Ark, habitantenan di Hulanda karibense mester por konta riba siguridat di eksistensia. Van Ark ta bisa ku e ta kontentu ku komo sekretario di estado e por a duna un aporte na esaki e añanan ku a pasa. E tin konfiansa ku ta sigui riba e liña positivo ku kabinete huntu ku e entidatnan públiko ta bayendo.


Den e añanan ku ta bini kabinete lo sigui traha ku e entidat públikonan i ku e Dialogo Sentralnan, den kua e entidatnan públiko i partnernan sosial ta traha huntu, na mehorashon di e situashon di e habitantenan di Hulanda karibense. Por ehèmpel aworaki ta investigando ki espasio tin pa hisa sueldo mínimo, teniendo kuenta ku e ekonomia i e merkado laboral. Kabinete ta wak tambe posibilidatnan pa strukturalmente baha gastunnan di energia, telecom i awa.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com