click

PLAY 

Wardakosta a intersepta un kantidat rekort di droga den 2019

Wardakosta region di karibe hulandes a interseptá un kantidat rèkòrt di droga den 2019. Ta trata aki di 10.100 kilo di kokaina i kasi 1.000 kilo di otro tipo di droga. Esaki ta hopi mas tantu ku den 2018, kaminda ku a interseptá 2.000 kilo. Esaki ta loke ku tin para den e relato di 2019 di wardakosta.

E oumento aki ta den liña ku e oumento den produkshon di kokaina den region i ta kuadra ku kantidat rekort di intersepshon na otro partinan. 


Mas aleu a detené 377 migrante ilegal, loke ta un oumento kompará ku 238 migrante den 2018. E situashon humanitario preukupante na Venezuela ta hunga un rol den esaki. Ta kombiná transporte di migrante ilegal ku kontrabanda di droga i arma. 


Den 2019 wardakosta a traha riba mehorashon di e organisashon i maneho di informashon di diferente forma. Riba tereno operashonal a traha duru riba miho supervishon di frontera na St. Maarten ku kompra di radar móbil i uso mas intensivo di e helikòpter di wardakosta i cutter. Riba tereno di personal tabatin adelanto relashoná ku e aktualisashon di e formashon. A garantisá e kapasidat di patruya aereo te 2022. E trayekto di remplaso di material tambe ta andando. Posibilidat di hasi uso di cutter ta keda un reto. Prinsipalmente e durashon di mantenshon anual i problemanan grandi ku cutter ta pone ku nan ta menos disponibel.


Riba tereno internashonal e training anual di wardakosta ‘Open Eyes’ huntu ku wardakosta di Venezuela no a tuma luga. Tabatin sí dos bishita di trabou na Colombia, dirigí riba mehorashon di e koperashon riba tereno di kombatimentu di droga i interkambio dii nformashon.


Ta garantisa e durabilidat finansiero di wardakosta pa medio di e plan di termino largu 2019-2028, pa kua tur e paisnan den Reino a komprometé nan futuro aporte. Hulanda ta pone anualmente 10.2 mion euro pa finansia e invershonnan di den e plan aki.


Den e voorjaarsnota di 2019 wardakosta a risibi medionan adishonal, ku ta usa pa reforsá e frontera marítimo i deskurasha migrashon ilegal. Di e medionan aki ta sòru pa kapasidat di radar móbil ku sistema di kamara na islanan abou, drone i waf di wardakosta na Boneiru.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com