click

PLAY 

Zr.Ms. Zeeland ta interseptá go-fast riba laman grandi 

E barku di Marina Real ku na e momentunan aki ta nabegá pa Wardakosta den Karibe a interseptá un boto tipo go-fast dia 1 di yüni ku 10 pakete di droga na bordo. A siguí e go-fast pa un tempu largu riba laman i radarnan i a logra para e boto ku su tripulantenan.

E avion Dash-8 huntu ku asistensia di e radarnan di Wardakosta den Karibe a detektá i siguí e kontakto sospechoso riba laman den serkania di Kòrsou. Riba potrètnan ku Dash a saka por a mira diferente bari di kombustibel na bordo di e go-fast kual a duna indikashon ku por ta transporte di kontrabanda. E barku Zeeland a persiguí e go-fast i na momento ku a yega den serkania di dje a lansa su botonan FRISC pa interseptá e go-fast. Durante di e persekushon durante oranan di anochi e avion Dash a duna Zeeland asistensia pa lokalisá e go-fast mas pronto posibel. E kantidat di droga ku a haña na bordo ta aproksimadamente 350 kilo di kokaina. E dos hòmbernan, e droga i otro pruebanan a keda entregá na outoridatnan na Kòrsou pa por siguí ku investigashon den e kaso.

Komandante di Zr.Ms. Zeeland, kapitan-luitenant Paul Bijleveld, ta satisfecho ku e interseptashon. E tin gran atmirashon tambe pa kon e kolaborashon entre tur e instanshanan ku a traha huntu den e kaso a kana. “E akshon akí tabata unu eksitoso, e avion Dash di Wardakosta a demostrá atrobe su balor agregá. Tur e diferente partnernan a traha duru i kordiná e trabou komo un team ku tur e unidatnan di Wardakosta. Henter e tim na bordo di Zeeland ta satisfecho ku nan por a demostrá ku den e krisis di COVID-19 tambe nan por tin eksito den e trabounan ku nan a bini p’é den Karibe; un di e trabounan banda di protehá i vigilá e kostanan ta e operashonnan di ‘counter-drugs’ den Karibe”, segun Bijleveld.

Zr.Ms. Zeeland ta un ‘Oceangoing Patrol Vessel’ di Marina Real. For di april 2020 e barku ta aktivo den Karibe. E barku di Marina Real ta duna asistensia den operashonnan di droga i yudansa humanitario. Banda di e trabounan aki e barku ta ehersé tareanan pa Wardakosta den laman Karibe manera entre otro, detektá peska ilegal, delitonan den e medio ambiente marítimo i yudansa den trabounan di buskeda i reskate. Pa por ehersé e tareanan aki e barku di Marina Real tin dos FRISC na bordo i un helikòpter NH-90. E barku Zr.Ms. Karel Doorman, ku ta un barku di transporte di Marina tambe ta den Karibe. Karel Doorman tabata parti di e akshon na momentu ku e tabata ‘stanby’ den kaso ku e mester a duna asistensia den forma di transporte médiko ku e helikòpternan Cougar ku tin na bordo. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com