click

PLAY 

ZVK BES ta obligá Fundashon Mariadal pa bai korte

Pa motibu ku un komunikado interno a keda publiká, Fundashon Mariadal kier duna un splikashon di lokual ku ta andando. “E ofisina pa seguro di kuido médiko pa Boneiru, Sint Eustatius i Saba (‘ZVK BES’) tin e obligashon pa paga pa e kuido ku Fundashon Mariadal a duna i ku e ta sigui duna na e habitantenan di Boneiru ku ZVK ta sigurá. E palabrashonnan pa esaki ta masha kla. Pero diripiente e ZVK no ta paga Mariadal”, asina Hunta di Direktiva di Fundashon Mariadal ta bisa. P’esei Fundashon Mariadal a entamá un kaso kontra e ZVK BES riba djarason 10 di yüni 2020.

“Naturalmente e fundashon lo a preferá di solushoná e asuntu akí huntu ku ZVK BES, sin bai wes. Pero si ZVK i e ministerio hulandes di Salubridat, Bienestar i Deporte (‘VWS’) no ta kumpli ku nan debernan, no ta keda Fundashon Mariadal nada otro ku ta di eksigí pago via wes”, e Direktiva di Fundashon Mariadal ta indiká, lamentando e desaroyo akí.

Sin konsekuensia
Fundashon Mariadal ta enfatisá ku e kaso hudisial lo no tin konsekuensia pa e kuido pa e pashènt-, kliente- òf otro habitantenan di Boneiru, tampoko pa e pashèntnan di Sint Eustatius i Saba ku ta hasi uso di nos hospital akí den e periodo aktual di COVID-19.

“Ta inkomprendibel i sigur-sigur iresponsabel e manera ku ZVK BES ta anda ku interesnan di e fundashon”, e Direktiva di Fundashon Mariadal ta remarká. “Anto pa kolmo den e periodo akí, den kua COVID-19 ta agitando henter mundu i tambe Boneiru kaba”, e Direktiva ta añadí. E desishon pa bai wes ta responsabel i hustifiká, segun e Direktiva, pa por sigui garantisá e kalidat i kontinuidat di e kuido.

Pa kasi dies aña kaba
For di e momento ku e islanan BES a bira parti di Hulanda riba 10-10-2010, e ZVK BES – ku ta e instansha ku ta ehekutá e parti di kompra di kuido pa VWS – ta sigurá e habitantenan pa gastunan médiko a base di lei. Pa kasi dies aña kaba ZVK BES ta kumpra un gran parti di e kuido akí serka Fundashon Mariadal, e dunadó di kuido di mas grandi na Boneiru.

Awor ZVK BES lo mester duna kuenta i rason den un huisio sumario dilanti di Korte di Promé Instansia di Boneiru tokante e falta di pago pa kuido ku Fundashon Mariadal a duna kaba i ku e tin ku duna ainda na e aseguradonan na Boneiru. E kaso ta planiá pa djarason 1 di yüli 2020.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com