click

PLAY 

A adapta e ordenansa di emergensia di Boneiru

A adaptá e ordenansa di emergensia di Boneiru riba algun punto. E kambionan tin prinsipalmente di haber ku reglanan ku tin, pa personanan ku ta bini Boneiru. Spesial pasaheronan ku ta bini for di Europa i Kòrsou tin ku tene kuenta ku e reglanan nobo aki.    

Desde 7 di sèptèmber tur pasahero for di 13 aña, ku ta bini for di un di paisnan di ménos riesgo di Europa, mester mustra un resultado negativo di un PCR-tèst ora yega Boneiru. Mester hasi e tèst maksimal 72 ora promé biaha pa Boneiru. Sin e prueba di un tèst ku resultado negativo e pasahero tin ku bai 14 dia den karentena na un sitio sentral riba propio gastu. 

Kòrsou, Aruba i Sint Maarten
Pa motibu ku e kantidat di kasonan di Covid-19 na Kòrsou, Aruba i Sint Maarten a subi drástikamente, a suspendé e asina yama ‘air-bubble’. No ta posibel pa biaha liber bini Boneiru. Tur pasahero ku ta bini for di e islanan aki mester di un pèrmit di gezaghebber Rijna si nan kier drenta Boneiru. Tur pasahero ku bini Boneiru mester bai 14 dia den karentena. Ta hasi un eksonerashon pa personanan ku un fishi esensial i ku ta bini Boneiru pa un temporada kòrtiku. Por ehèmpel un wes ku mester bini Boneiru pa tratamentu di un kaso. E personanan aki mester tene nan mes na e instrukshonnan di higiena i no ta liber pa move na Boneiru.      

Deklarashon obligatorio
Ta obligatorio pa tur persona ku ta bini Boneiru pa yena e deklarashon di salú mínimo 48 ora promé nan yegada. Por haña e deklarashon na  https://bonairepublichealth.org/nl/form . Tur dato ku yena den e deklarashon ta bai pa departamento di Salubridat Públiko i ta trata e datonan konfidensial. Esun ku kier un pèrmit di gezaghebber pa bini Boneiru mester manda un e-mail na repat@bonairegov.com.

Den e ordenansa di emergensia tin instrukshon tambe pa enkuentronan sosial, horeka i aktividatnan deportivo. E medidanan aki ta pa protehá tur hende na Boneiru kontra e vírùs di corona i evitá ku e ta plama. Si bo tin keho keda kas i yama 0800-0800. Sigui e instrukshonnan di higiena pa protehá bo mes i esnan rondó di bo.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com