click

PLAY 

Blue Destination Company Certification ta sertifiká e promé kompania ku tres strea

VIP Diving ta e promé kompania ku a keda sertifiká ku tres strea pa Blue Destination Company Certification. 

VIP Diving, ku ta un di e kompanianan di buseo konosí na Boneiru, a keda sertifiká ku e rekonosementu di mas haltu, kual ta tres strea pa Blue Destination Certification. Esaki ta nifiká ku e kompania ta kumpli ku 99% di e kriterionan stipulá pa e hunta di direktiva di Blue Destination Certification huntu ku e tim di Green Destinations. E kriterionan tin di haber ku bienestar sosial i empleo lokal, siguridat i salubridat, energia i klima, sushi, awa, naturalesa, medio ambiente i herensia kultural. 

E sertifikashon di Blue Destination Certification ta rekonosé e esfuerso ku e kompania ta hasi riba tereno di durabilidat pa naturalesa, kultura i ekonomia di nos isla. Ademas, e bon práktika aki ta demostrá i enfatisá e kompromiso ku e kompania tin pa sigui desoroyá den un manera sostenibel. Esaki sigur ta un bon stap den e direkshon pa e vishon di Boneiru pa kombertí den e promé Blue Destination. 

Manera ya ta konosí kaba, den e luna di òugùstùs, kuater kompania den e sektor hotelero a keda sertifiká pa Blue Destination Certification. Esakinan ta Red Palm Village ku dos strea, Delfins Beach Resort ku dos strea, Divi Flamingo Beach Resort ku un strea i Harbour Village ku un strea. 

Ya tin 28 kompania ku ta interesá pa partisipá den e siguiente temporada di sertifikashon. E organisashon di Blue Destination Company Certification ke hasi un invitashon na tur kompania ku ta interesá pa risibí mas informashon òf ku ta interesá pa partisipá den e siguiente temporada di sertifikashon, pa tuma kontakto ku Kámara di Komèrsio via imeil na: project@kvkbonaire.com.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com