click

PLAY 

Boneiru ta kodigó oraño pa Hulanda

En konekshon ku oumento di kantidat di infekshonnan di e vírùs di corona, gezaghèber Rijna, riba konseho di EBT (Eilandelijke Beleidsteam) wikènt pasá, a manda petishon pa Ministerio di Asuntunan Eksterior na Hulanda pa asigná un  konseho di biahe oraño pa Boneiru. Entretantu, RIVM tambe a emití konseho pa hasi e konseho di biahe pa Boneiru mas skèrpi, debí na oumento di infekshonnan. Desde awe, 22 di sèptèmber, e konseho di biahe pa Boneiru a kambia pa oraño. 


Pa motibu ku a deklará Boneiru komo area oraño, Ministerio di Asuntunan Eksterior ta konsehá pasaheronan pa biaha pa e isla solamente si esaki ta nesesario. Biahe di vakashon no ta nesesario, pues esaki no ta rekomendabel. Pa pasaheronan ku ta bini Boneiru, ainda ta obligatorio pa hasi un tèst 72 ora promé ku salida i mustra e resultado di tèst negativo na yegada. Si no hasi esaki, mester bai den karentena pa 14 dia (riba kosto propio).


EBT ta konsiente ku e kambio aki tin konsekuensia grandi, spesialmente riba sektor turístiko. Pero debí na oumento di infekshonnan aktual na Boneiru, ta importante pa limitá e riesgo di infekshon eksterno i redusí movementu riba e isla pa medio di e konseho di biahe aki. Esaki ta duna e departamentu di Salubridat Públiko mas tempu pa realisá investigashon adekuá di e fuente i kontaktonan di e infekshonnan aktual pa kontené e vírùs i evitá un sobrekarga di e sistema di salú. Ayera gezaghèber a papia ku representantenan di BONHATA i awe ku KVK, kaminda ambos partido a kompartí nan vishon i preokupashon, i a konkretisá akuerdonan pa futuro.


E kantidat di infekshon na Boneiru a oumentá te na e punto, kaminda segun indikashon di RIVM, Boneiru ta apuntá komo area oraño. Asina ku e kumplimentu di e medidanan kondusí na un kantidat di infekshon abou, e konseho di biahe ta keda ahustá di nobo.


E modifikashon den konseho di biahe tin konsekuensia pa pasaheronan for di Boneiru ku ta biaha (bèk) pa Hulanda. Bishitá e wèpsait www.nederlandwereldwijd.nl pa mas informashon tokante biahe pa Hulanda. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com