click

PLAY 

Dutch Caribbean Nature Alliance, DCNA, resientemente a publiká un edishon spesial di su newsletter digital, BioNews, tokante e importansha pa diseñá i implementá práktikanan di turismo sostenibel den karibe hulandes. E idea ta pa promové práktikanan sostenibel riba kada un di e islanan pa yuda konservá i restorá e medio ambientenan natural mientras ku ta mehorá e eksperensia di e bishitantenan i e bida di habitantenan.


Prome ku 2020 biahe internashonal tabata birando mas fasil i mas barata. Tabatin preshon pa ofresé bishitantenan eksperensianan tòp na preis barata loke hopi biaha a krea tenshon entre maneho di naturalesa i konservashon, i e industria di turismo. Ta importante pa kòrda dikon turistanan ta bishitá e islanan aki, hopi biaha ta pa probechá di e naturalesa, awa limpi i ekosistemanan diverso ku nan tin di ofresé.


Por hinka e situashonnan prinsipal ku kada isla lo topa kune den kuater kategoria: oumento den preshon humano, konsumo di rekursonan natural, infrastruktura inadekua pa atende ku (awa) sushi i kambio di klima. Kada isla lo mester konsiderá kon pa adaptá i atendé ku e kuater problemanan aki si nan ta desea di diseñá un plan di turismo sostenibel.


No ta fasil tur ora pa midí e efektividat di un plan di turismo sostenibel. Na momentu di determiná e éksito general ta importante pa konsiderá tres aspekto: medio ambiente (kon e isla fisikamente ta reakshoná riba turismo), sosial (kon turismo ta afektá kultura lokal i kon turismo ta influenshá satisfakshon di habitantenan) i ekonomiko (kon e islanan ta benefisiá finansieramente di turismo).


Konsumidornan ta siñando ku nan eskohonan ta kontribuí na e salú general di medio ambiente lokal, i mas i mas komponentenan medio ambiente i étiko ta definí “kalidat”. Ekoturismo a mira un kresementu e ultimo añanan, por mira esaki den Boneiru su esfuerso pa bira e prome destinashon blou na mundu. Ekoturismo por resaltá algun di e miho karekterístikanan natural di e islanan mientras ku ta keda permití turistanan pa bini i eksplorá. E edishon spesial di BioNews ta eksplorá e diferente opshonnan disponibel i ta proveé rekomendashonnan pa kada isla konsiderá.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com