click

PLAY 

E tamaño di e poblashon trahadó na Boneiru, esta esnan entre 15 i 74 aña, na 2018 tabata 15.400 ku 73.1% trahando, 4.6% mas ku na 2012. Esaki segun e publikashon Trends in the Caribbean Netherlands 2020 di CBS. E partisipashon na e forsa laboral na 2018 tabata mas haltu ku na 2012. Di e hende hòmbernan 74.9% tabatin un trabou na 2018 kompará ku 70.2% na 2012, mientras ku 71.1% di hende muhé tabata traha na 2018 kompará ku 66.6% na 2012. Partisipashon ta relativamente abou serka personanan jong i esnan ku edukashon abou. Apesar di esei partisipashon laboral di tur grupo a oumentá entre 2012 i 2018 ku eksepshon di esnan ku un edukashon haltu, ku un bahada di 6%. Desempleo na Boneiru tabata algu mas ku 3% na 2018, kompará ku kasi 6% na 2012. Esaki ta ekivalente na kasi 370 persona desempleá na 2018 ku aktivamente tabata buskando trabou. Na 2012 tabatin 550 persona desempleá.


Na 2018 kasi 3.800 habitante di Boneiru no tabata forma parti di e forsa laboral lokal. Na 2012 esaki tabata 3.500. Nan no tabata buskando trabou ni nan no tabata disponibel pa traha, mayoria biaha tabata un kombinashon di nan dos. E grupo disponibel pero no buskando trabou a baha na 2018 kompará ku 2012: di 18 bai 11 porshento.


Un grupo grandi (35% na 2018, 30% na 2012) tabata personanan ku no tabata kier of no tabata por traha dor di edat haltu of penshun. Pa 22% di esunnan ku no tabata parti di e forsa laboral na 2018, residentenan jong enpartikular, edukashon tabata e motibu prinsipal ku nan no tabata kier of no tabata disponibel pa traha. Na 2012 esaki tabata 20%. Otro gruponan mas chikitu ta inkluí hendenan ku no por a traha dor di un desabilidat (11%) of pasobra nan mester a kuida famia, 6%.

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com