click

PLAY 

Dia mundial di turismo ku e tópiko desaroyo urbano

E aña akí, United Nations World Tourism Organization (UNWTO) a selebrá dia mundial di turismo ku e tema “Desaroyo Urbano”. E selebrashon di turismo i desaroyo urbano, ta enfatisá e kapasidat uniko ku e sektor aki ta ofresé den desaroyo ekonomiko i ta duna oportunidat na distriktonan i komunidatnan pafo di siudat ku no ta risibí debido atenshon. Tambe e ta demostrá e importansia di e ròl ku turismo ta hunga, ora ta trata di preservashon i promoshon di kultura i patrimonio rònt mundu. 

Den e siman tras di lomba, Tourism Corporation Bonaire (TCB) a presentá un video edukativo demonstrando e diferente ofishinan ku tin den e sektor turistiko na skolnan básiko di grupo 5 te ku 8. E meta di e video ta pa e hobennan por mira kon nan por kombertí nan interes of hòbi den un profeshon den e sektor turistiko, den futuro. Tambe a lansa e video aki riba e página di Facebook di TCB. 

Alabes, TCB den kolaborashon ku e outor Denise de Jong-Rekwest, a krea un buki titulá “Turismo na Boneiru, Bo Futuro!”, kaminda kada kapítulo ta ilustrá diferente elemento den e sektor turistiko. Skolnan básiko lo risibí e buki aki den futuro binidero, ya asina kada studiante entre grupo 5 te ku 8 por amplia nan konosementu di turismo na Boneiru i sa kua ta tur e aktividatnan ku tin pa ofresé na turistanan. 

TCB ta pone enfasis riba konsientisashon i kresementu di interes bou di hobennan pa un posibel karera den e sektor turistiko den futuro. 

TCB ta ekstende un invitashon na pueblo di Boneiru pa sigui nos riba nos paginanan di Facebook i Instagram na Ingles “Bonaire Tourism” i na Papiamentu “Tourism Corporation Bonaire”. Suskribí na nos “newsletter” via marketing@tourismbonaire.com, pa keda bon informá di tur desaroyo den turismo na Boneiru. Alabes TCB ta rekordá pa mantene distansia sosial, husa tapa boka, laba man mas frekuente i sigui informashon i anunsio di medida di parti di gezaghebber. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com