click

PLAY 

Ekonomía di Boneiru a krese den 2018

E produkto interno bruto (bbp) di Boneiru a oumentá ku un volúmen di 3,9 porshento na 2018. Na Sint Eustatius tabatin un bahada di 11,8 porshento i na Saba e bbp a baha ku 2,5 porshento. Esaki ta loke CBS ta indiká basa riba sifranan nobo. 


E mutashon den volúmen di e bbp ta e desaroyo di e balor di e bbp koregí basá riba e desaroyo di preis. Pa e korekshon di preis a hasi uso di e índise di preis pa konsumidó. 


Kresementu den hóreka, konstrukshon i institutonan finansiero na Boneiru 

E balor agregá di hóreka na Boneiru a subi ku 19,3 porshento. Ku esaki konhuntamente ku e instansianan finansiero, hóreka ta e industria ku mas a krese den 2018. E kresementu den hóreka ta kana konhuntamente ku e apertura di establesimentunan nobo den hóreka na aña 2018. Tambe e kantidat di turistanan ku a drenta pa medio di avion i turistanan krusero a oumentá ku 10 porshento. A konstruí na abundansia na Boneiru den aña 2018. E produkshon di konstrukshon a oumentá ku mas di 6 porshento. 

Pa motibu ku e uso intermediario (e produktonan i servisionan ku ta usa den e proseso di produkshon) den konstrukshon a subi ménos drástiko, e balor agregá a oumentá ku 13 porshento. 

E demanda pa bibienda ta grandi na Boneiru i esaki ta bisto na e kantidat di kasnan ku a bende i e preisnan di e kasnan, kual a subi ku respektivamente 52,8 porshento i 21,6 porshento na 2018. Agente di real estate  i hürdó di kasnan a benefisiá di esaki. E balor agregá di e hür i komèrsio den bienes a oumentá ku 9,5 porshento. E servisionan empresarial tambe a benefisiá di e merkado di bibienda fuerte. Ademas e oumento den e kantidat di turista tambe a sòru pa un oumento serka kompanianan di hür outo den e industria empresarial. 


Tambe tin industrianan ku a presta ménos bon den 2018. E balor agregá di e industria di transporte, informashon i komunikashon a baha ku 15,5 porshento. E bahada aki tabata okashoná pa algun kompania grandi ku ta aktivo den transportashon i almasenahe di merkansia. E kompanianan aki a ser influensiá negativamente dor di desaroyonan den e industria petrolero regional. E sobrá kompanianan den e industria aki a operá bon den 2018. Tambe e bahada den agrikultura i ekstrakshon di mineral ta debí na un kompania grandi. 


E balor agregá di kompanianan di utilidat a baha ku 4,9 porshento, paso e konsumo a subi mas ku e produkshon di awa (7,2 porshento) i koriente (-0,3 porshento). Meskos ta konta pa kuido, kaminda enbèrdat e produkshon a oumentá, pero no di mesun forma ku e uso intermediario. 

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com