click

PLAY 

 Enkuesta COVID-19 di Kámara di Komèrsio

Kámara di Komèrsio Boneiru (KvK) for di djaluna 14 di sèptèmber durante un siman ta tene un enkuesta bou di empresarionan pa haña un bista riba e impakto aktual di e krísis di corona riba empresanan na Boneiru. Por haña e lenk pa e enkuesta riba e wèpsait di Kámara di Komèrsio Boneiru. Intenshon di e enkuesta ta tambe pa verifiká si e medidanan ku a tuma anteriormente ta adekuá pa empresanan na Boneiru. Ta usa e informashon pa na un manera bon argumentá por indiká na e Ministerionan relevante na unda mester adaptá e medidanan pa hasi nan mas efektivo pa Boneiru. Segun gerensia i direktiva di KvK ta importante ku ‘komo organisashon Kámara di Komèrsio ta sòru pa bos di nos empresanan ta zona bon fundá den e medidanan nobo ku a anunsiá. Nos mester pèrkurá ku ta usa e medionan ku a pone disponibel mas efektivamente posibel pa tene Boneiru su ekonomia salú’. 

Dia 28 di ougùstùs último gabinete a duna di konosé ku nan ta bai prolongá e sosten di Corona pa Hulanda Karibense. Esaki ta nifiká pa nos habitantenan ku ta prolongá e redukshon temporal di gastu pa koriente, awa di bebe i internèt for di 31 di desèmber di e aña aki te 1 di yanüari 2022. Pa empresarionan esaki ta nifiká ku ta prolongá e supsidio temporal di gastunan di salario i pèrdida di entrada ku 9 luna. Dentro di poko ta bira evidente di ki manera e prolongashon aki ta haña forma.

E enkuesta di Kámara di Komèrsio ta sali via diferente kanal, entre otro e propio wèpsait i medionan sosial. E meta ta pa mas ku 200 enkuesta yená drenta bèk na Kámara di Komèrsio pa por hasi ekspreshonnan representativo tokante bienestar di empresanan na Boneiru.

Ta manda resultado di e enkuesta aktivamente pa e empresanan ku a partisipá i a laga nan adrès di imeil atras na final di e enkuesta, asina ku e resultado ta konosí i un análisis di e resultado a tuma lugá. Pa prensa tambe na mes momentu lo pone un bista general di e resultado disponibel.    


Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com