click

PLAY 

FUHIKUBO ofisialmente NGO di UNESCO pa patrimonio kultural intanhibel

Durante seshon 8 di Asamblea General di UNESCO di e Konvenshon 2003 di Patrimonio Kultural Intanhibel, Fundashon Kultural Históriko di Boneiru, FUHIKUBO, a keda akreditá ofisialmente. Esaki a tuma lugá na Paris, Fransia i a sosodé huntu ku 35 otro NGO di rónt mundo inkluso Fundashon Museo Tula di Korsou. Tabata djàweps 10 di sèptèmber 2020 mitar di shete anochi ora di Paris kaminda e Asamblea General a aseptá i akredita 36 NGO, for di un kantidat di 65 petishon di rònt mundu. 

Kiko ta e benefisionan?

Na promé luga FUHIKUBO a haña rekonosimentu mundial pa su trabou ku el a bin ta hasi pa mas di trinta aña riba e tereno di dokumentá i asina salbaguardia Patrimonio Kultural Intanhibel di Boneiru i otro isla di eks Antia Hulandes. UNESCO ta rekonosé e balor di e trabou, pero tambe e ekspertisio riba e tereno di Patrimonio Kultural Intanhibel. FUHIKUBO ta awor parti di e kuerpo ku ta duna konseho na e Komishon di NGO mundial di e Konvenshon UNESCO ICH 2003, i por invit’é pa ta parti di e Komishon di Konvenshon èi tambe. ICH ta para pa Intangible Cultural Heritage. E trabou di e Komishon ta pa duna konseho riba e lista Internashonal di Patrimonio Kultural Intanhibel den nesesidat pa salbaguardiá, konseho riba diferente programa, projekto i aktividat ku ta parti di e Konvenshon UNESCO ICH 2003, petishon pa asistensia internashonal i e efekto di e plannan eksistente en konekshon ku e elementonan inskribí riba e Lista Internashonal di Patrimonio Kultural Intanhibel den nesesidat pa salbaguardiá.

Pa medio di e posishon aki, FUHIKUBO ta denter di e nètwèrk huntu ku e otro NGOnan di UNESCO i asina ta probecha di e relashonnan aki i tambe e rekurso riku (informashon i finansas pa medio di proyekto konhuntu) ku esakinan ta trese kune. Naturalmente, na mes momento, ta kompartí e trabounan di FUHIKUBO tambe mundialmente i asina Boneiru su Patrimonio Kultural Intanhibel tambe ta konosí rónt mundu. Orguyosamente nos por subi wèpsait di UNESCO i mira FUHIKUBO i Boneiru!

E Konvenshon di ICH 2003 ta unu spesial kaminda den su kuadro por aserká UNESCO direktamente pa bin na remarke pa akreditashon. Asina ta ku FUHIKUBO mes por a manda su formulario aden direktamente sin pasa via Hulanda. E ngonan ta bin na remarke despues di kumpli ku tur rekisito i na desèmber último durante e di 14 seshon di e komishon konsulativo na Colombia a vota pa esaki. Komo ku Boneiru ta parti di Hulanda i Hulanda ta miembro fundadó di Nashon Uní i UNESCO, i ku tambe a rekonosé e Konvenshon ICH 2003, Boneiru tin Hulanda komo State Party.  Hulanda ta miembro tambe pa kuater aña (2018-2022) den e Komishon di e Konvenshon ICH 2003 i a vota pa Boneiru na Colombia. 

Riba 10-10-10, Boneiru, despues ku 25 aña tabata parti di Sekretariado UNESCO Antias, a bin resulta bou di Sekretariado UNESCO Hulanda. Esaki a nifiká, komo ku Hulanda ta miembro fundadó di UNESCO, Boneiru no ta bin na remarke pa fondo pa proyekto i awor ta kai den grupo I (Europa) i no Grupo III (Amerika Latina i Karibe). Na 2015 a lanta “Grupo di Trabou di UNESCO Boneiru” rekonosé pa Gobièrnu di Boneiru i Sektretaro General di UNESCO na Hulanda, pa traha, konsehá i asesorá riba tur tereno di UNESCO na Boneiru. Di parti di ‘Grupo di Trabou di UNESCO Boneiru’: FUHIKUBO pabien! Boneiru pabien!

Bon FM 102.7 | Kaya Irlanda 11 | Ofisina 717 2102 / Studio 717 3102 | bonfm@hotmail.com